The Definitive Guide to Living in the Capital , Cairo , Egypt

بقى لنا فترة منقطعين عنكم بسبب ظروف فيروس “كورونا” المستجد، بس حبينا نتشجع ونشجعكم على الرجوع للحياة من جديد بمطعم سوري أكله مميز وسعره مناسب جدًا، ممكن تروحوا تاكلوا فيه حتى في أيام الشغل من غير ما ميزانية الشهر تضرب، أو في أوقات الليل لما الجوع يهجم عليكم.

المطعم اسمه “أكلِة” تنطقها بالسوري، وهو أكلة من اللي قلبك يحبها فعلًا لأنها معمولة بحب ومخدومة جدًا. المطعم له فرع في المهندسين وفرع في 6 أكتوبر، رحنا فرع المهندسين وتقدروا تشوفوا صفحة المكان على الفيسبوك والمنيو من هنا. المنيو متنوع ما بين سندوتشات ووجبات ومناقيش وسلاطات وفيه كمان حاجات للفطار زي الأومليت بالجبنة وبالبسطرمة وفيه مناقيش حلوة بالنوتيلا وبالموز، والقرفة بالتفاح، كلها حاجات شهية جدًا حاولنا ننوع وإحنا بنطلب علشان ننقل لكم التجربة كاملة. 

المكان إندوور مكون من دورين، أول ما بتدخل المكان بتطلب تحت وتدفع حسابك، وبعدين تطلع فوق، بتكون ترابيزتك جاهزة ومعقمة ومتغلفة، واللون الأصفر الخاص بلوجو المكان فاتح نفسك للحياة، الأكل جالنا فوق في الدور الثاني بعد حوالي 20 دقيقة سخن ويفتح النفس. 

طلبنا وجبة كريسبي “علب أكلة” كومبو بـ 80 جنيه، وهي مكونة من فراخ كرسبي صوت قرمشتها بيقسم مزيكا في ودانك، مش مزيتة خالص، بيتقدم معاها رز بسمتي أصفر مفلفل خطير، وتومية ومخلل وكول سلو كلهم أحلى من بعض. 

كمان طلبنا من السندوتشات سندوتش دجاج سوبريم بالعيش الصاج سعره 33 جنيه، وهنا بقى لينا وقفة، عارفين شكل الفنانة إسعاد يونس وهي بتعذبنا بحركة إيدها من استمتاعها بالأكل في برنامجها “صاحبة السعادة”؟ هو كده بالظبط، رول ملفوف من العيش الصاج والجبنة بالبقسماط متحمر وجواه 3 أنواع جبنة وسوسيس وقطع دجاج وخيار مخلخل وأحلى دلع والجبنة بتمط معاك في الساندوتش وتفضل تجري وراها. مع بطاطا بالجبنة بـ 15 جنيه مقرمشة وتجنن.

أما بقى المفاجأة في شاورما أكلة لحم اللحمة بـ 82 جنيه، كانت حراقة وملهلبة وتدخلك عالم تاني من الطعم المختلف، أولًا قطع الشاورما سميكة وحلوة مش رفيعة أو مفتتة، ولا العينات اللي بنشوفها عادة وبتكون قليلة، ومعاها تومية وطحينة وصلصة، حاجة كده تخليك مش عاوز حاجة من الدنيا غير مشروب غازي تحبس بيه وتدخل تنام على طول علشان أنت كده مبسوط. 

جربنا برضه ساندوتش لحمة الفراخ كيزر بـ 15 جنيه، وكان نفس التقطيعة السميكة مع تومية تجنن، وخيار مخلل. 

طلبنا كمان من المناقيش منقوشة جبنة بالزعتر بـ 22 جنيه، حاجة كده ولا في الأحلام لأن مش أي مكان بيعرف يظبطها الصراحة جبنة خفيفة وطعم الزعتر مش طاغي على الجبنة والعجينة رفيعة وطازة وهشة. 

كمان من المقبلات والسلطات طلبنا قطعة كبة بـ 10 جنيه كانت محمرة ومقرمشة وحلوة جدًا توابلها مضبوطة، وسلاطة تبولة كانت طازة جدًا وتحديقها يعدل المزاج غير إن البرغل فيها مش كتير ودي أحلى حاجة كانت متوازنة وتفتح نفسك أنك تدوس أكتر في الأكل.

كان نفسنا نجرب الحلو بس حقيقي ماكنش فيه مكان، وأكيد هنخليه للمرة الجاية لأن ده بقى من أماكننا المفضلة خلاص اللي سعره على قد جيبنا وبناكل فيه أكل نضيف مخدوم معمول من القلب وبيوصل للقلب.