The Definitive Guide to Living in the Capital , Cairo , Egypt

تشجيع السياحة واجب على كل شخص بيحب البلد دي، لأن السياحة من مصادر الدخل المهمة في مصر، وعلشان بلدنا جميلة، ممكن إحنا كأفراد نعمل حملات دعاية نشجع بيها السياحة في بلدنا، وده بالظبط اللي عمله “عمار عيد” مع “داليا محمد”، وهما اتنين من المصورين المميزين في مصر،  واللي عملوا مشروع تصوير بعنوان “الحب في صحراء الفيوم”.

في السطور الجاية هنعرفكم على تفاصيل الفكرة.

الفكرة جت لعمار لما شاف فيديو كليب بيتصور في قرية تونس، وهي واحدة من أشهر الأماكن في الفيوم، فقرر مع داليا أنهم يصوروا فوتوسيشن “الحب في صحراء الفيوم”، وعلشان المشروع الفني يخرج بشكل محترف قرروا الاستعانة بمهندسة الديكور جهاد عبد اللاه، اللي شاركتهم في كل تفاصيل التصوير والألوان والديكور.

وتجهيز وتنفيذ الفوتوسيشن أخد منهم حوالي 5 شهور للوصول لأفضل نتيجة زي ما واضح في الصور.

عمار عيد قال لـ كايرو 360 إن الفوتوسيشن هدفه الرئيسي محاولة دعم السياحة الخارجية والداخلية، وإن الناس ترجع تزور الفيوم مرة تانية، بسبب إنها بتتمتع بجمال طبيعي وأماكن مميزة.

الفوتوسيشن اتصور في شمال بحيرة وادي الريان، وهي منطقة محمية طبيعية، ومن المعروف أن منطقة وادي الريان من أهم المزارات السياحية في الفيوم، وفيها “البحيرة العليا – البحيرة السفلى – الشلالات – جبل المدورة – عيون الريان – قارة جهنم”، ولها طبيعة خلابة ومساحتها واسعة والهواء هناك نقي وصافي.