The Definitive Guide to Living in the Capital , Cairo , Egypt

كنوع من أنواع العرفان بالجميل، والتقدير للمجهودات الجبارة، وخدماته الإنسانية اللي مافيش اتنين في العالم كله يختلفوا عليها، قرر جهاز مدينة حدائق أكتوبر، إطلاق اسم الجراح العالمي السير “مجدي يعقوب” على أكبر طريق في المنطقة، وهو الطريق المؤدي لأهم الكمبوندات السكنية في حدائق أكتوبر، زي كومبوند دجلة جاردنز، والمنتزه، والحي الإيطالي، والرباب، وغيرها من الكومبوندات في المنطقة.

طريق الدكتور مجدي يعقوب هو أول طريق في مصر بيحمل اسم الطبيب المصري العالمي، ومؤسس مؤسسة مجدي يعقوب لأمراض القلب في أسوان.

والجراح العالمي “مجدى يعقوب” واحد من الأطباء العالميين اللي قدروا يغيروا دنيتنا للأحسن بفضل علمه وأبحاثه الطبية الهايلة، واللى كانت سبب في منح حياة جديدة لكتير من المرضى المصابين بمشاكل مختلفة في “القلب”، ولإن تخصصه جراحة “القلب” بقى مكانه في “قلب” كل مصري.

الدكتور مجدي يعقوب من مواليد بلبيس – محافظة الشرقية، في 16 نوفمبر سنة 1935 وليه أصول صعيدية. درس الطب في جامعة القاهرة، رغم إنه ماكنش من الأوائل في الثانوية العامة وقتها، وبعد ما اتخرج، بدأ مهنته كطبيب سنة 1957، وفي 1963 راح بريطانيا علشان يكمل دراسته، ومن بعدها راح لأمريكا علشان يكمل دراساته العليا.

خلال مسيرته المهنية، حصل على “قلادة النيل” و”وسام الاستحقاق البريطانى” ولقب “سير” من الملكة “إليزابيث” وحصل على زمالة كلية الجراحين الملكية في لندن، ده غير ألقاب ودرجات علمية وشرفية كتير من جامعات عالمية عريقة ومرموقة.