The Definitive Guide to Living in the Capital , Cairo , Egypt

لما بنفكر في فترة سيطرة النازية على أوروبا، بنسأل نفسنا هل كان فيه ناس عارضت الظلم والقتل ده؟ هل فيه ناس قررت تقول “لأ” بصوت عالي مهما كان الثمن؟ فيلم A Hidden Life بيحكي قصة واحد من الناس اللي قالت “لأ”.

فيلم A Hidden Life بيحكي عن القصة الحقيقية للنمساوي “فرانز ياجيرشتاتر” اللي رفض الخدمة في الجيش النازي في فترة الحرب العالمية الثانية بكل ما تحمله تبعات مخاطر الرفض ده عليه وعلى أسرته.

قصة الفيلم بسيطة لكن جذابة في نفس الوقت.. لأنها بتطرح فكرة فلسفية مهمة، وهي قدرة الإنسان على الثبات على موقفه ورأيه، في مقابل المميزات اللي ممكن يحصل عليها لو بس وافق يخون أفكاره ومبادئه، القرارات اللي بياخدها أي شخص في الوقت ده هي اللي بتحدد مدى إنسانيته وأخلاقه الحقيقية.

بنشوف في الفيلم مجموعة كادرات أكثر من رائعة، ونقدر نقول إن حركة الكاميرا في الفيلم كانت أكثر من ممتازة، أما عن اختيار أماكن التصوير أو “اللوكيشنز” فهي كمان كانت ممتازة، وخدمت الفيلم على المستوى البصري بشكل رائع، لكن مشكلتنا الأساسية كانت مع سيناريو الفيلم.

طول الوقت في إحساس إن A Hidden Life مش للمُشاهد العادي اللي عاوز يتفرج على فيلم روائي تقليدي، لإن كتير من مشاهد الفيلم كانت بتدينا انطباع إننا أمام فيلم تسجيلي مهتم بتوثيق الأحداث أكثر من اهتمامه بتقديم قصة روائية، خاصة في الجزء الأول من الأحداث.