The Definitive Guide to Living in the Capital , Cairo , Egypt

واضح إن الدورة الـ 51 من معرض القاهرة الدولي للكتاب واللي هتقام من 22 يناير لـ 4 فبراير، هتكون دورة مميزة عن غيرها من الدورات اللي فاتت، والتميز ده واضح جدًا من خلال الإصدارات المتنوعة اللي أعلنت عنها كتير من دور النشر المشاركة في المعرض السنة دي، ولإن “كايرو 360” هو دليلكم للحياة في العاصمة، اخترنا لكم النهارده كتابين مميزين هنشوفهم في معرض الكتاب 2020 موضوعهم الأساسي هو “القاهرة” وتاريخها والأحداث اللي حصلت في شوارعها العتيقة، تعالوا بينا ناخد لفة مع الكتابين دول:

حكمدار القاهرة – النسخة النادرة من مذكرات “توماس راسل” :

الكتاب بياخدنا في رحلة لمجتمع المجرمين في مصر في زمن الاحتلال، بيحكيها حكمدار القاهرة “راسل باشا” وبيقدم فيه حكايات غريبة وقصص نادرة عن شريحة مهملة من المجتمع المصري في الوقت ده.

توماس راسل كان ضابط شرطة إنجليزي، خدم في وزارة الداخلية المصرية سنة 1902، وفي سنة 1918 وبقى حكمدار للقاهرة وخد لقب باشا، وأسس أول مكتب لمكافحة المخدرات في مصر، وسنة 1946 انتهت خدمته في مصر ورجع لندن واتوفى هناك سنة 1954.

الفترة الزمنية اللي بيحكي فيها “راسل” عن مذكراته مع المجرمين والقتلة والحرامية ومروجي الدعارة في القاهرة كانت ما بين 1902 و1946 لكن المذكرات اتكتبت سنة 1949وهو من ترجمة الروائي والباحث المصري المبدع “مصطفى عبيد”.

خريدة القاهرة – شئ من سيرة الأماكن والأشخاص:

المؤلف “حامد محمد حامد” بيعيشنا في حكايات بتدي لأماكن معينة في القاهرة روح بتميزها، وبيحكي لنا حكايات جميلة عن حياة ناس كانوا هنا، وعاشوا قبلنا على نفس الأرض دي، ومصيرهم من البداية للنهاية ارتبط بمصير الأماكن اللي فيها.

منتظرين المعرض علشان نستمتع بالكتب دي!