The Definitive Guide to Living in the Capital , Cairo , Egypt

أسبوع كان غريب، تقلبات جوية ومود بيتغير كل شوية، وضغط كتير حوالينا، وعلشان نعمل ريفريش ونغير مودنا، لازم نستغل الويك إند في اننا نعمل حاجة حلوة، وعلشان كدة في كايرو 360 هنقولكم على أهم الحفلات والأنشطة اللي هتحصل خلال نهاية الأسبوع، منها ننبسط ونفرح نفسنا، ومنها نرجع بكل طاقتنا لشغلنا.

نبدأ بالنهارده الخميس.. وعندنا الساعة 7 مساءً حفلة مميزة الفنان محمد سعيد في ساقية الصاوي، وسعر التذكرة 57 جنيه.

أما فرقة الصحبجية الإسماعيلاوية فهتكون موجودة في مسرح الضمة وسط البلد الساعة  8 مساءً، وهناك تقدروا تستمتعوا بفنهم الفلكلوري، وسعر التذكرة 50 جنيه.

وكمان تقدروا تحضروا عرض Cairo Steps Orchestra Project في دار الأوبرا المصرية الساعة 8، بتذكرة سعرها 210 جنيه.

يوم الجمعة.. هيكون فيه حفلة إنشاد ديني لفرقة صبا في مركز الربع الثقافي، الساعة 5 بعد العصر، وسعر تذكرة الحضور 20 جنيه.

الفنانة جالا الحديدي هتحيي حفل عيد الميلاد السنوي لها في دار الأوبرا المصرية، الساعة 8 بالليل، وسعر التذكرة 160 جنيه.

والساعة 7:30 مساءً، الشيخ محمود التهامي هينشد أبدع القصائد في حفلة ساقية الصاوي، بتذكرة سعرها 67 جنيه.

أما يوم السبت.. حفلة أسياد الزار اللي بتخرج الطاقة السلبية من جواكم هتبدأ الساعة 8 مساءً على مسرح الضمة بتذكرة سعرها 50 جنيه.

وفي رووم آرت سبيس الساعة 9 بالليل، هتسمعوا كوكتيل موسيقى من فريق Let’s Go BIG’s first official concert، بسعر تذكرة 100 جنيه.

أما ساقية الصاوي فهتقدم لنا فريق روك فيروس الساعة 8 مساءً، علشان تستمعوا معاهم بأجمد الأغاني وسعر التذكرة 77 جنيه.