The Definitive Guide to Living in the Capital , Cairo , Egypt

Fish & ships ده مطعم قديم في وسط البلد، وكان اسمه “أسماك الشامي” وكان مطعم شعبي مميز بأكله الحلو، واتغير اسمه بعد تغير إدارته، ومن المفارقات أن الملك فاروق كان حريص أنه ياكل في المطعم ده كتير، خاصة لما يكون راجع من سهراته لقصر عابدين.

تميز الأكل ماوقفش عند الإدارة القديمة، لكنه لسه مستمر حاليًا، وكل مرة بنزورهم فيها بيبهرونا أكتر، وخلال السطور اللي جاية هنقولكم على تجربتنا الجديدة في المطعم، اتفضلوا معانا.

المطعم زي ما قلنا في تجربة سابقة قبل كده، ديكوراته مميزة، وأكتر حاجة بتميزها أنها معمولة بإيد صاحبة المكان الحالية، والمدخل بتاعه فيه ورد كتير، صحيح حاليًا صناعي مش طبيعي زي زمان، بس مدي بهجة حلوة، وكمان الباب بتاعه محافظ على أنه يكون على الطراز القديم وبلكونته أصبحت أيقونة للتصوير في وسط البلد، وهما متخذين شعار “لو مكلتش اتصور”، وأول ما تدخل هيلفت انتباهك كمية الديكورات الموجودة، سواء اللوحات الخشب أو صور الفنانين وكلمات من الأغاني التراثية، والكراسي والكنب الخشب.

بعد الترحاب الجميل من المكان واللي متعودين عليه، قلنا نبدأ بشوربة سي فود عضم بـ120 جنيه، وبتيجي حمراء أو بيضاء، وإحنا اخترنا البيضاء، وبتكون خفيفة نوعًا ما، وجواها جمبري كبير “3 قطع” وقواقع وواحدة كابورية متكسرة وغيرهم، وطعمها كان مميز جدًا، ومظبوطة في الملح وضايفين عليها جنزبيل علشان يديها طعم مميز أكتر، ولكن كان ينقصها بالنسبة لينا إنها تكون سبايسي، ودي غلطتنا إننا مطلبنهاش كده من الأول.

كمان حبينا نجرب سمك بوري مشوي فحم بـ150 جنيه، وده اختراع يا جماعة حبيناه جدًا، عبارة عن سمكة بوري متقطعة قطع بحجم متوسط، ونقدر نقول إنها بحجم اللقمة، ومشوية على نار الفحم، وطعمها يهبل جدًا، ومانقدرش نوصف جمال الطعم، ولا السوا اللي بيخلي السمكة تدوب في الأكل، وكمان إنك تشيل القشرة سلس جدًا، ونصيحة مننا يا تطلبوها لوحدها يا لازم يكون حد معاكم لأنها كبيرة، وكمان معاها طبق الأرز الشهير بتاعهم بالخضرة، واللي بيتميز أنه طعمه فريد من نوعه.

الأصناف والاختراعات كتير ولكن في الحقيقة إحنا اكتفينا بدول في المرة دي، وأكيد هنزورهم تاني علشان نجرب الأكلات المميزة اللي عندهم، وماتتخضوش لو دخلتوا لقيتوا مشاهير من كل المجالات، ومش هتلاقوا أي اختلاف بينكم وبينهم في الخدمة وحفاوة الاستقبال، وخلوا بالكم أن المكان صديق للحيوانات الأليفة، وعندهم قطط حوالين المكان.