هيضم 1000 قطعة.. كل اللي محتاجين تعرفوه عن متحف الغردقة الأثري
آثار الغردقة المتحف المصري رمسيس الثاني متحف
Mohamed Talaat
أخيرًا وبعد طول انتظار، بدء العد التنازلي لافتتاح أول متحف أثري ينشأ بين القطاعين العام والخاص بنسبة شراكة 50%، واللي هيكون موجود في مدينة الغردقة في محافظة البحر الأحمر، واللي مقام على مساحة 10 آلاف متر وفيه مبنيين رئيسين، وكل مبنى مكون من دورين، وهيشمل على 1000 قطعة أثرية أصلية من عصور مختلفة.
ومن المتوقع افتتاح المتحف في الربع الأول من سنة 2020، واللي مكانه جنب الممشى السياحي جنوب الغردقة، واتكلف 160 مليون جنيه، بمباني على مساحة 3000 متر، وفاضل التجهيز الداخلي من ديكورات وفتارين عرض للقطع الأثرية اللي بالفعل بدأت توصل الغردقة واستلم المتحف 32 قطعة من أصل 1000 هيتوفروا للعرض من مخازن ومتاحف القاهرة.
المتحف هيهتم بشكل أكبر بآثار البحر الأحمر، اللي منها المعبد الرومانى بسفاجا علشان تكون مناسبة مع المنطقة، بجانب عرض للتراث الثقافي، وهتكون القطع الأثرية بشكل كبير خاصة بمحافظة البحر الأحمر، منها القطع الأثرية بوادى الحمامات وآثار المدينة الرومانية بسفاجا، والمدينة الرومانية بالجونة، وغيرها من آثار مختلف العصور، وبينها معروضات ذهبية، وجزء خاص بآثار أسرة محمد على، والمسرح الرومانى.
وحسب تصريحات صحفية نشرتها الوطن قالت صباح عبد الرازق، مدير عام المتحف المصري بالتحرير، إن الجزء العلوي لتمثال الملكة ميريت أمون هيغادر مكانه علشان يتم عرضه في متحف الغردقة، وهو أحد الكنوز المعروضة بالمتحف المصري وعثر عليه داخل المعبد الجنائزى لرمسيس الثانى، ويعتبر من روائع فن النحت فى عصر الدولة الحديثة، وبيصور الجزء العلوى من تمثال للملكة مريت أمون بنت الملك رمسيس الثانى.
