The Definitive Guide to Living in the Capital , Cairo , Egypt

مصدر الصورة من هنا.

لو كنتم من اللي قلبهم جامد، وبتحبوا المغامرة والاستكشاف والإثارة، فريق كايرو 360 هيقولكم على 9 رحلات برية تقدروا من خلالها تكتشفوا الطبيعة، وتتعرفوا على مصر أكتر، بتقدمها صفحة المستكشف المصري، وهي صفحة متخصصة في الرحلات البرية للأماكن الغريبة، فقررنا ننقلها لكم في حالة لو حبيتوا تشاركوا معاهم.

كنوز سيناء:

دي رحلة هتكون من 25 لغاية 28 سبتمبر 2019، لأرض الفيروز، وهتستكشفوا فيها “جزيرة فرعون – خليج الفيورد” وهتخيموا في “راس شيطان” وهتعملوا سفاري في وادي الوشواشي والوادي الملون، والوادي الأبيض، وواحة حضر، وكمان هتشوفوا نواميس سيناء وجبل المكتوب، وصخرة المشروم ومحمية طابا.. لتفاصيل أكتر عن الرحلة، ادخلوا هنا.

بحيرة البرلس ورشيد:

في الرحلة دي هتتعرفوا على حياة سكان البرلس من الصيادين، وهتشوفوا الآثار القديمة والبيوت الملونة، وهتروحوا مدينة رشيد علشان تشوفوا الآثار بتاعتها، وكنوزها الإسلامية وتتعرفوا على تاريخها الحربي، وكمان هتزوروا البيوت العثمانية اللي ليها طراز معماري فريد، دا غير استكشاف الساحل الشمالي للدلتا والبحر المتوسط، الرحلة دي هتكون من 4 لـ 5 أكتوبر 2019.. والتفاصيل من هنا.

واحة سيوة:

توقيت الرحلة اللي هيكون من 11 لـ 14 أكتوبر 2019، هيوافق عيد الصلح، وده عيد بيحتفل بيه أهل الواحة كل سنة احتفالات مميزة، ويعتبر من أهم الأحداث في رحلة واحة سيوة اللي هتشمل الإقامة في فندق بيئي، وزيارة مدينة شالى الأثرية، وجبل الموتى، ومشاهدة الغروب، وشرب الشاى السيوي، وزيارة أطراف سيوة ومناجمها وبحيرات الملح الشهيرة، ده غير زيارة مجموعة كبيرة من المعابد والآثار المميزة.. تفاصيل رحلة سية هتلاقوها هنا.

الواحات والصحراء البيضاء:

دي رحلة لهواة الاستجمام والريلاكس والطبيعة، هتكون يوم 18 أكتوبر، للواحات البحرية والصحراء البيضاء والسوداء، وواحة “الحيز” وواحة “خضرا” ووادي “العجبات” وجبل “الكريستال” وهتستمتعوا في نهايتها بالغروب وعد النجوم بالليل، وهتحضروا شروق تاني يوم كمان.. التفاصيل من هنا.

كنوز الوادي الجديد:

الرحلة دي هتكون مخصوصة لاستكشاف ثروات الوادي الجديد، وهتكون كعادة رحلات المستكشف المصري الفريدة من نوعها، وهيبقى فيها زيارة لواحة باريس وواحة الخارجة وواحة تنيده وواحة بشندي وواحة موط وواحة القصر، وتقريبًا معظم واحات ومعالم الوادى الجديد.. التفاصيل من هنا.

الفيوم:

الرحلة هتكون يوم 25 أكتوبر الجاي، وهتزوروا فيها قرية تونس والبحيرة المسحورة، وبحيرة قارون، وشلالات وادي الريان، والبحيرة السفلى، وقصر قارون، وكمان هيكون متاح تسلق جبل المدورة، دا غير فسحة بالمركب في بحيرة قارون.. تفاصيل أكتر عن رحلة الفيوم هتلاقوها هنا.

 النوبة:

اتسمت “بلاد الدهب”، وفي الرحلة دي هتعرفوا ليه اتسمت كده، وهتكون يوم 14 نوفمبر 2019، وهتستمتعوا فيها بالمناظر الطبيعية والحياة البرية ومراقبة وتصوير الطيور المهاجرة، وهتتعرفوا على التاريخ القديم للنوبة وهتزوروا معابد ومقابر مختلفة، ده غير رحلة في بحيرة ناصر، وزيارة الآثار المشهور بيها بلاد النوبة.. التفاصيل من هنا.

النوبة القديمة:

لو كنتم من عشاق الطبيعة زي ما هي بخيرها، فالرحلة دي معمولة علشانكم، الرحلة هتكون للنوبة القديمة، وهتطلع يوم 28 نوفمبر، والسكن خلال الرحلة هيكون في بيت نوبي جوه جزيرة نوبية، الدخول ليها أو الخروج منها عن طريق النيل بس، وخلال الرحلة هيكون في زيارة لجزيرة “هيسا” ومأذنة “بلال” وجزيرة “فيلة” الأصلية، وجزيرة عواض وجبل شيشة، ومنطقة بربر وغرب سهيل وغيرها من أجمل الأماكن النوبية.. تفاصيل الرحلة دي من هنا.

حلايب وشلاتين:

الرحلة دي تعتبر فرصة لكل اللي عاوزين يزوروا حلايب وشلاتين، الرحلة هتنطلق يوم 6 ديسمبر، وهيكون فيها زيارة لجبل حلايب اللي لونه أخضر بسبب تفاعله مع الأمطار، وكمان هتزوروا أجمل أماكن البحر الأحمر في مرسى علم والقصير وجبال الصحراء الشرقية، وجبل علبة، ومحمية أبرق وأبو سعفة وخليج القلعان وشاطئ جنكوراب، ومحمية وادى الجمال وقرية أبو الحسن الشاذلى ، وكل دا في رحلة واحدة.. التفاصيل من هنا.