The Definitive Guide to Living in the Capital , Cairo , Egypt

بعد شهرين من البحث والتصوير، كشفت البعثة المصرية الأوربية التابعة للمعهد الأوروبي للآثار البحرية، عن وجود شواهد أثرية في قاع البحر في منطقة أبو قير في الإسكندرية، وده اللي  أعلنته وزارة الآثار المصرية، وأكدت في إعلانها على توصل البعثة لموقع بقايا مدينتين أثريتين، وهما “كانوب” و”هيراكلون” اللي كانوا غرقانين في خليج أبو قير.

الاكتشاف ده كان على جدول أعمال الموسم الأثري الحالي، وتضمن الكشف عن مجموعة أبنية تابعة لمدينة “كانوب” بعيدة مسافة كيلو تقريبًا عن الاكتشاف الأول، ده غير اكتشاف مجموعة من الأواني الفخارية، والعملات الذهبية والمعدنية، وخواتم وحلقان ومقتنيات ذهبية تابعة للعصر الصاوي، وعملات بورونزية وعملات ذهب من العصر البيزنطي، وده اللي دفع وزارة الآثار في إعلانها على “الفيسبوك” إنها ترجح إن المدينة الأثرية المكتشفة دي كان فيها سكان غالبًا من القرن الرابع قبل الميلاد وفي العصر الأول الإسلامي.

البعثة كمان كشفت عن وجود جزء من معبد مدمر بالكامل، وكان غالبًا هو المعبد الرئيسي للمدينة، واسمه “آمون جرب”، وكمان كتير من الأواني الفخارية، ومستلزمات الطعام من القرن الثاني والثالث قبل الميلاد، وعملات برونزية من عصر الملك “بطليموس الثاني”، وبعض الأعمدة، على مسافة 3 متر تحت قاع البحر، وبقايا معبد يوناني صغير في طمي القناة.