The Definitive Guide to Living in the Capital , Cairo , Egypt

رمضان بيحب اللمة، والخروج من الجو العادي والتقليدي لأجواء مختلفة ومميزة، مش بتحصل غير شهر كل سنة، ويمكن مرة واحدة في الشهر الكريم ده، علشان كده، مهم جدًا إن المرة دي تكون مختلفة وذكراها تفضل معانا أطول وقت.

حاولنا في (كايرو 360) نجيبلك أكتر 5 أماكن ممكن تفطر أو تتسحر فيها مع أصحابك أوعيلتك بأسلوب مختلف، لو أنت من عشاق الأجواء الرمضانية.

المركب “Al Markeb”:

على كورنيش المعادي في مشروع إسمه “المركب” وبيوفر تجربة فطار وسحور ممتعة في النيل، مع أشهى الأكلات الشرقية، اللي بيقدمها مطعم “أم حسن” مع برنامج ترفيهي مختلف، ممكن تلعب فيه “بلايستيشن” و”طاولة” وسط جو موسيقي شرقي أصيل.

صفحة الفيس بوك:  Almarkeb

المطعم الدوار:

تجربة فطار رمضاني ولا أجمل، وكفاية إنك هتفطر وانت فوق أعلى نقطة في القاهرة، وتحديدًا في المطعم “الدوار” في (برج القاهرة) والمصمم علشان يلف 360 درجة؛ وده هيخليك تشوف القاهرة كلها وانت بتاكل جوه المطعم.

المطعم ليه ستايل كلاسيكي مريح جداً، حاجة كده من التمنينات، والمنيو عنده بيقدم أكلات ثابتة (set-menu) ممكن تختار منها اللي يناسبك، ده غير مجموعة مختلفة من المشروبات الرمضانية.

صفحة الفيس بوك: Cairo Tower – برج القاهرة

مطعم العهد الجديد:

مطعم العهد الجديد في منطقة الحسين، أجوائه رمضانية قديمة على عكس اسمه، هتحسسك إنك رجعت لأيام القاهرة الفاطمية، ده غير أكلاته المصرية الشعبية المصرية بامتياز، زي الكباب والكفتة والطرب والممبار والنيفة والكوارع والفتة والمحاشي.

 صفحة الفيس بوك: Al ahd al Gaded Restaurant – مطعم العهد الجديد

مركب “كافيلوكة”:

ميزة “مركب كافيلوكة” على كورنيش النيل – الدقي إنها بتجمع بين فلكلور الفلوكة العادية اللي كلنا عارفينها وبين ديكور البيوت الشرقية، علان كده هتحس انك في صالة بيتكم، لكن في قلب النيل.

المركب ممكن يأجره من 8 لـ 10 أشخاص، علشان تضمن مساحة تنقل وقعاد ظريفة، ده غير جودة الأكل.

 صفحة الفيس بوك: كافيلوكة – Cafelluca

حاتي فرحات:

تقريبًا مفيش حد في القاهرة مايعرفش “حاتي فرحات” بفروعه الكثيرة المنتشرة في أنحاء القاهرة، لكن كلامنا النهارده على فرع “حاتي فرحات” في الحسين اللي أول ما هتدخله حتحس بإن آلة الزمن خطفتك لأيام محمد علي باشا.

 المطعم متخصص في تقديم وجبات صعب تلاقيها بالجودة اللي هيقدمهالك في أي مكان تاني، زي الحمام المحشي بالفريك والزبدة، ده غير قائمة كبيرة من المشويات بأنواعها.

صفحة الفيس بوك: كبابجى الأزهر فرحات