The Definitive Guide to Living in the Capital , Cairo , Egypt

كالعادة بعد الفطار في رمضان، بييجي الحلو. ومن فترة سمعنا عن محل حلويات سوري اسمه “حلويات نصار” في وسط البلد. فقولنا نجرب ونقولكم على التفاصيل.

المحل شيك جدًا، وكل حاجة فيه بتلمع ونضيفة. عندهم حلويات شرقي وغربي، شيكولاتات، مستلزمات كحك العيد، كنافة بالمانجو وغيرها. قررنا نطلب تشكيلة مميزة من اختيارانا، وبكميات قليلة علشان نجرب كل الأنواع.

طلبنا ربع كيلو حلويات مشكل (بسبوسة بعين الجمل – دولما بالفستق – تارت كريم كراميل – بسبوسة بالفستق)، كان سعرهم 40 جنيه بس. كلهم بلا استثناء كان العسل فيهم كتير، والحشو قليل. واعملوا حسابكم، الكمية قليلة لكن محتاجة حد أكيل. لأن مش أي حد يقدر يكملها من حلاوتها. تارت الكريم كراميل كان متغرق جدًا. والدولما دي اكتشاف، بس لازم الحشو يظهر فيها.

عندهم منتجات كتير، وعلب جاهزة. لفت نظرنا إن عندهم كحك وبسكويت وبيتي فور، بيبدأ من 60 جنيه للعلبة النص كيلو.