The Definitive Guide to Living in the Capital , Cairo , Egypt

على الرغم من مرور ما يزيد عن 45 سنة على إنتاج فيلم Papillon في نسخته الأولى، واللي قام ببطولته اتنين من عظماء السينما أيامها – وحتى اليوم –  وهم ستيف ماكوين وداستن هوفمان. الفيلم نجح نجاح كبير جدًا وقتها وحقق ما يزيد عن 53 مليون دولار لحد اليوم.

ويمكن أهم سؤال كنا بنسأله لنفسنا قبل مشاهدة الفيلم، هل هيقدر فريق عمل الفيلم الحالي مواجهة أسماء بحجم ستيف ماكوين وداستن هوفمان؟

في البداية Papillon بيحكي عن هنري اللي بيقوم بدوره تشارلي هونام واللي بيتم اتهامه بجريمة قتل لم يرتكبها، وبيتم إرساله لسجن، عبارة عن مستعمرة كاملة بتضم مجموعة من أشرس وأسوأ المجرمين. واللي بيتم ارتكاب سلاسل من التجاوزات فيها طوال الوقت. لكن هنري بيتعرف على ديجاس – وقام بالدور رامي مالك- واللي بيشكل مع رفيقه ثنائي بيخطط للهرب من واحد من أكثر السجون قسوة في العالم.

تشارلي هونام مش بيقدم أعمال كتير، لكن الأدوار اللي بيقوم بيها مؤثرة وقوية. نفتكر منها دور الملك أرثر في فيلم King Arthur: Legend of the Sword ودوره في سلسلة أفلام Pacific Rim وغيرها من الأدوار القوية.

لكن كان من الغريب أن المخرج مايكل نوير يدخل مغامرة ورهان على إسم فيلم كبير مع هونام، خاصة أن اللي بيشاركه البطولة رامي مالك، وهو أمريكي من أصل مصري معروف ببطولته لمسلسل Mr.Robot وعلى الرغم من بطولته مؤخرًا Bohemian Rhapsody واللي حقق نجاح نقدي وفني كبير، إلا أن الدخول بالبطلين دول في عمل بالقيمة دي كان مغامرة. وأثبتت المغامرة نجاحها.

من الأمور المميزة في الفيلم إخراج مشاهد الأكشن، لكن بعض المشاهدين ممكن يشوفو الفيلم دموي بشكل أزيد من اللازم شوية. لكن في كل الأحوال الفيلم قدم صورة قاتمة لكن ممتعة ومميزة، وقدم تصور مختلف لفكرة السجن بشكل عام. وساعدت كادرات التصوير والتلاعب بالإضاءة على توفير الجو المطلوب علشان يخرج الفيلم في النهاية بصورة جيدة.

لكن الملاحظة الأخيرة عندنا هي أن الفيلم مش جيد مقارنة بنسخة 1973، ودي ملاحظة بدأنا نشوفها في كتير من الأفلام اللي تعتبر إعادة إصدار أو تقديم لأفلام قديمة. لكن لو المشاهدين هيشوفوا الفيلم بشكل منفصل عن العمل الأصلي ممكن يعجبهم ويجدوا فيه فيلم قوي ومميز.

علشان تبقى عارف: الفيلم يعتبر إعادة إنتاج لفيلم (Papillon) اللي صدر عام 1973.