The Definitive Guide to Living in the Capital , Cairo , Egypt

دايمًا بنحب الجديد، وعلشان كده قررنا ننقل لكم تجربتنا مع مكان اسمه “عالحصيرة”، وده مكان مختلف من حيث ديكوراته وقعده، وحتى الأكلات اللي بيقدمها.

المكان موجود ورا حديقة الحيوان في الجيزة، وهو عبارة عن دور أرضي، ميزيدش عن 100 متر، بس تحس إنه براح بس التقسيمة المميزة، وفيه قعدات مختلفة طبلية وشلت عربي، وكراسي وترابيزات، وكمان فيه لبس لثقافات مصرية مختلفة تقدر تتصور بيهم هناك، والسقف من الحصير، والديكور من روح الريف المصري وده بالنسبة لنا كان هايل.

دخلنا وقعدنا وقررنا نطلب حاجة جديدة، ونسيبنا من المشلتت والفطائر والبيتزا اللي كل الناس بتعملها، وبالفعل اخترنا حاجة كده اسمها “فوندو عالحصيرة”، بــ46 جنيه للحجم الصغير، بخلاف الخدمة والضريبة،  وهو عبارة عن بيتزا بتتقدم في طاجن مع عيش كرسبي، وبتتكون من سلامي وتركي وروست ببف وموتزاريلا، وكوكتيل جبن الحصيرة، ومتغرق بصوص باربيكيو، العيش الكرسبي كان مجرد فينو متحمص، وحتى الريحان اللي عليه ماكنش مديله طعم، وكنا نتمنى يكون عليه شوية كمون يخلوا طعمه وريحته جميلة جدًا.

أما الطاجن بقى فكان عبارة عن 3 قطع روست بيف، وجبنة موتزاريلا، ومش لاقيين أي طعم للمكونات اللي كانت موجودة في المنيو، وكمان كان الزيت كتير جدًا في الطاجن اللي كان صغير زيادة عن اللزوم بالنسبة لسعره.

كمان طلبنا أم علي، علشان نحلي بـ33 جنيه، بخلاف الضريبة والخدمة، الحجم كان صغير جدًا بالنسبة للسعر، وكمان كان سكرها كتير جدًا، وضايقنا جدًا أنها مافيهاش “مكسرات”.. أم علي من غير مكسرات إزاي بس يا جماعة؟!

المكان بشكل عام روحه حلوة، وهادئ وتقدر تغير جو فيه، وممكن تروح تاكل مشلتت فيه أو فطير خفيف، لكن بشكل عام مبننصحش بالطواجن نهائي، والتجربة خير دليل.