Mohammed Sabry
زهقان من الملل والروتين؟ عاوز تجرب حاجة جديدة، غير جو الأكل وبعده خروجة على كافيه؟ إحنا جبنا لك 8 أماكن فيهم ألعاب مختلفة ومثيرة. وكمان تناسب كل الأعمار. هتروح هناك تقضي وقت مع أصحابك ينسيك أي حاجة تانية:
1- Trapped Egypt
اللعبة اللي بدأت في اليابان، وموجودة في أمريكا والصين وسنغافورة، دلوقتي موجودة في مصر. هتعيش تجربة الحبس في أوضة، وتحاول تحقق في مؤامرات وتحل ألغاز، علشان تقدر تهرب.
ودي صفحتهم على فيسبوك.
2- Escape Games Cairo
أماكن ومغامرات كتيرة ومختلفة. وألغاز معقدة لازم تحلها علشان تقدر تهرب من الأوضة اللي انت فيها. يا ترى قد التحدي؟
ودي صفحتهم على فيسبوك.
3- Escape room Egypt
فريقك انت وأصحابك مطلوب منه يهرب من المكان اللي محبوس فيه خلال 60 دقيقة بس. كده يا إما دي هتكون نهايتكم.
ودي صفحتهم على فيسبوك.
4- Gravity Code
بتحب التنطيط والفرفشة؟ جرافيتي كود عبارة مساحة كبيرة فيها ترامبولين، تقدر تروح مع أصحابك تتنطط وتلعب فيها. وكمان فيها ألعاب مختلفة زي Cageball اللي برضو بتعتمد بشكل أساسي على الترامبولين.
ودي صفحتهم على فيسبوك.
5- Breakout Egypt
أول وأكبر تجربة خطف حقيقية من 2014. انت ومجموعة من أصحابك بتختاروا غرفة من 7 غرف، تقضوا فيها ساعة واحدة. وتحاولوا تهربوا منها بأشكال مختلفة، زي حل ألغاز أو تحرير رهينة.
ودي صفحتهم على فيسبوك.
6- The Maze Egypt
من أقوى تجارب الهروب اللي ممكن تمر بيها. انت وفريقك هتكونوا في المتاهة، وتحاولوا تخرجوا عن طريق حل ألغاز مختلفة. بس كل ده في أقل من 60 دقيقة، وإلا تبقوا خسرانين.
ودي صفحتهم على فيسبوك.
7- Escapology Egypt
فيها تجربتين مختلفتين، واحدة بتكون فيها جوة أوضة شيرلوك هولمز. وبتحل ألغاز علشان توصل للقطعة الأثرية المخفية فيها. والتانية بتكون مخطوف من جماعة إرهابية، وبتحاول تهرب علشان ترجع لأصحابك.
ودي صفحتهم على فيسبوك.
8- Ski Egypt
مين مابيحبش البطاريق واللعب في التلج. هناك هتستمتع بوقتك مع البطاريق، وتشوفها قدامك وتلعب معاها. وكمان هتنبسط بألعاب الجليد المختلفة. والمكان مناسب للأطفال والكبار.
ودي صفحتهم على فيسبوك.
