The Definitive Guide to Living in the Capital , Cairo , Egypt

الفن لغة تعارف الشعوب، وهو كمان أكتر حاجة الإنسان بيقدر يعبر بيها عن مشاعره في صورة إبداعية جميلة، برغم إن ممكن يكون فيه ناس مش عندها الخبرة الكافية أو العلم اللي يساعدهم يطلعوا منتجات إبداعية أو لوحات فنية. وده اللي حاولت تعمله أفنان خريجة كلية فنون جميلة واللي قررت تحول سطوح بيتها لأستديو  وسمته “ستديو أفنان” علشان تعلم كل الناس إزاي يقدروا يعبروا عن نفسهم من خلال الفن وتعلمهم الأصول وتسيبهم بعد كده ينطلقوا. ونتيجة الأستديو ده معرض فني لأغلب اللي شاركوا في الدورات التعليمية اللي عملتها وعرض لوحاتهم.

النهارده هيبدأ معرض “إبداعات لونية” أول معارض “ستوديو أفنان” واللي  مستضيفه ومشارك في تنظيمه مشروع التحرير لاونج جوتة، واللي  بيدعم كل أشكال التعبير الإبداعي والفني، وهيحضر افتتاح المعرض الفنان الدكتور أشرف رضا الأستاذ بكلية الفنون الجميلة النهارده الخميس 19 يوليو من الساعة 7 مساءً ولحد 9 مساءً بمقر المشروع بمعهد جوتة في وسط البلد.

المعرض هيكون فيه مجموعة من الأعمال المليانة باللمسات الجمالية والمواهب الفنية الفريدة لمجموعة من الفنانين الموهوبين اللي اتعلموا من خلال أستديو أفنان، وتتنوع الخامات اللي استخدموها في اللوحات ما بين الألوان الزيتية والرصاص والباستيل والكولاج، كمان هيكون فيه كتالوج فيه وصف المعرض وتعريف بالفنانين المشاركين ولوحاتهم.

الجميل في المعرض أنه غير هادف للربح والهدف منه هو دعم الفنانين الشباب بشكل أساسي، وعرض نظرتهم الفنية، والتأكيد على أن الفن وسيلة هامة من وسائل التعبير، وأن الفن مش موهبة بس لكن كمان ممارسة وتعليم مهما كان سنك أو خبرتك.

والمعرض  هيستمر لحد يوم 25 يوليو ما عدا يوم الجمعة والسبت من الساعة 12 ظهرًا ولحد 9 مساءً.

 علشان تبقى عارف:

أفنان سمير هي فنانة اتخرجت من كلية الفنون الجميلة سنة 2013، واشتغلت كعضو فني بقصر الفنون بدار الأوبرا، وشاركت  كمان في معارض فنية  كتير منها صالون الشباب ال26 بدار الأوبرا المصرية، ومعرض “هي” بقاعة إبداع، و”صالون الجنوب” بالأقصر. وعملت “ستوديو أفنان” في يوليو 2017، وعملت لحد دلوقتي حوالي 12 تدريب في مجالات فنية مختلفة تخرج خلالها حوالي 60 فنان. تقدر تشوف موضوع كايرو 360 عن أفنان من هنا.