The Definitive Guide to Living in the Capital , Cairo , Egypt

كتب: محمد عدلي

السنة دي عندنا مسلسلين بيناقشوا تقريبًا نفس الأفكار، لكن مش بنفس الطريقة ولا نفس أسلوب الطرح، عندنا مسلسل “طايع” من إخراج عمرو سلامة، وبطولة عمرو يوسف، ومسلسل “نسر الصعيد” إخراج ياسر سامي، ومن بطولة محمد رمضان، مسلسلين بيناقشوا فكرة الثأر وتجارة الآثار في جزء كبير من حلقاتهم، الاتنين بيدوروا في صعيد مصر، ومعظم أبطالهم بيتحدثوا اللهجة الصعيدية، لكن فرق كبير بين العملين.

لما عرفنا إن المخرج عمرو سلامة قرر يشتغل دراما السنة دي، قولنا أكيد الموضوع مش هيعدي بالساهل، عمرو سلامة من المخرجين الشباب اللي قدموا في الفترة الأخيرة سينما أثارت جدل كبير خصوصًا  الموضوعات اللي بيختار يقدمها، قدم لنا فيلم أسماء عن سيدة مصابة بالفيروس المؤدي للإيدز، وإزاي المجتمع بيعاملها بوصم رغم أن الذنب مش ذنبها، قدم لنا السنة اللي فاتت فيلم شيخ جاكسون، واللي أثار جدل كبير سواء مع رجال الدين أو على مستوى التنفيذ الفني.

في مسلسل طايع قرر عمرو سلامة مع الأخوة دياب (محمد وخالد وشيرين دياب) تقديم موضوع قديم بمعالجة جديدة، الثأر وتجارة الآثار لكن بشكل مختلفة ومن زوايا إنسانية اكتر .

تفوق عمرو سلامة ظهر أكتر لحد دلوقتي في كادرات وتنفيذ مشاهد المقبرة الفرعونية، المشاهد اللي جمعت عمرو يوسف وأحمد داش، أما عن أداء الممثلين، فرغم إن المسلسل بطولة عمرو يوسف، واللي بيقدم دور من أهم أدواره من حيث التركيز وتطور الأداء ورغبته دايمًا في تقديم الجديد، إلا أن حضور عمرو عبد الجليل كان قوي جدًا وأصبح له مدرسة خاصة بيه الناس حبته من خلالها حتى لو بيقدم شخصية فيها شر.

ومن عوامل نجاح المسلسل كمان الإضاءة، وكمان تتر المسلسل اللي غناه المطرب وائل الفشني وناس كتير اعتبرته أفضل تتر مسلسل في رمضان .

على الجانب التاني هنلاقي مسلسل “نسر الصعيد” ورغم ان الخطوط العريضة فيه هي الثأر وتجارة الآثار برضه، إلا إن هنا السيناريست محمد عبد المعطي فصل سيناريو على مقاس محمد رمضان بالملي، مشاهد أكشن غير مبررة لمجرد إن محمد رمضان يظهر عضلاته وقدرته في الضرب وجمل بيقولها البطل اللي المفروض ظابط شرطة كلها وزن وقافية بشكل لا يليق مع شخصيته اللي بيقدمها في المسلسل زي “اللي يغلط في ظابط شرطة، يبقى حط نفسه في ورطة”.

وطبعًا أهم حاجة هو ظهور محمد رمضان بشخصيتين، شخص يموت في الأول وشخص بيكمل باقي الأحداث وينتقم له، الحديث عن الإخراج أو حتى عن باقي الأدوار في وجود محمد رمضان هيكون نوع من تضييع الوقت والعبث، حتى ممثل قدراته رهيبة زي سيد رجب لم يقدم أي جديد في شخصيته داخل المسلسل عكس باقي الأدوار اللي عملها.

 في النهاية قدر عمرو سلامة ورفاقه إنهم يثبتوا إن حتى لو الفكرة مش جديدة لكن معالجتها تمت بشكل مختلف هتنال إعجاب الناس، و بخلاف اللهجة الصعيدية اللي تفوق فيها محمد رمضان على عمرو يوسف، نقدر نقول إن طايع اصطاد نسر الصعيد.