The Definitive Guide to Living in the Capital , Cairo , Egypt

كل سنة في رمضان العيلة بتتجمع بعد الفطار على طبق الحلو، والسنة دي تورتينا ما عملتش أنواع جديدة كتير بس لسه محتفظة بجودتها وأناقتها. قررنا نروح زيارة لتورتينا المعادي علشان نشوف إيه أكتر منتج عندهم هيشدنا علشان نجربه.

شوفنا هناك حاجة جديدة لفتت انتباهنا وهي برطمنات صغيرة فيها مهلبية بالجيلي، ده غير أم علي اللي بالمارشميلو والكريمة، والكنافة بالمانجو العادية والكنافة بالتراميسو، كمان كان فيه تارت مارس بالكنافة وتارت البلح بنفس السعر.

كمان شفنا الكنافة بالنوجة اللي متغطية بالكريمة والصوص التوت.

تورتينا عاملة ركن خاص بالحلويات الشرقية والطبق فيها بـ 175 جنيه، أما الميني كنافة فللأسف مافيش منها سايب ونوزن بالجرام زي السنة اللي فاتت لكن بتتباع كعلبة كاملة بـ 140 جنيه.

منظر “الرواني” شدنا جدًا، فقررنا نشتريها، بـ 240 جنيه، وهي عبارة عن طبقة كيكة متشربة بالعسل تحتها كريمة مع قطع مانجو وموز وبعدين تحت طبقة بسبوسة، والحقيقة إنها كانت خفيفة جدًا على عكس المتوقع، بس كان نفسنا كمية الكريمة تبقى أكتر من كده وقطع المانجو تزيد كمان، غير كده كان طعمها رائع.

تجربتنا في تورتينا كانت مرضية جدًا، نتمنى إنهم يفضلوا على نفس المستوى وأحسن كل سنة. لو عاوزين فعلًا حلويات رمضانية مميزة وسعرها مناسب ننصحكم بزيارة تورتينا.