The Definitive Guide to Living in the Capital , Cairo , Egypt

قدمنا قبل كدة على كايرو 360 تقرير عن أفضل الكتب إللي بتتكلم عن موضوعات نفسية بتفيد الناس.. مؤخرًا صدر كتاب المُعالجة النفسية وفاء شلبي أنا مريضة نفسيًا، وطبعًا كان لازم نشتريه، ونعرف إذا كان فعلًا كتاب مهم ولا لأ.

الكتاب ده مختلف عن الكتب إللي بتناقش موضوعات نفسية  لإنه مذكرات وتدوين حر.. معظم الكتابة في المجال ده بتكون كتب علمية مبسطة بيقدم فيها الدكتور مادة علمية بحتة أو بيكتب كتاب بيجمع فيه قصص الحالات إللي بتزوره في عيادته وإللي ليهم مشاكل متشابهة زي مثلًا حالات المشاكل الجنسية والإدمان والعلاقات الزوجية.. لكن في الكتاب ده إنت بتقرأ مذكرات وخبرات فردية ووجهات نظر وطبعًا مادة علمية متعشقة بشكل سلس وسط الحكايات بحكم تخصص الكاتبة.. يعني إنت كقارئ قدام تجربة تدوين  متخصصة وده شيئ مميز.. في نهاية الكتاب هتحس إنك عرفت وفاء شلبي وقابلتها وفهمت دماغها وحابب تشرب معاها فنجان قهوة وتحكي كتير!  يمكن بحكم شطارتها كمعالجة نفسية هتقدر تحركك من جوة وتخليك حاسس بأهمية تلقي العلاج النفسي.

من مقدمة الكتاب: “الكتاب عبارة عن مذكراتي من أول ما ابتديت أشتغل بمهنة العلاج النفسي لحد دلوقتي، خبرات ومهارات علاجية، توعية نفسية بالأمراض والعلاج وتربية الأطفال والمراهقين وإزاي تعيش بمزاج مش تعيش وخلاص، وإزاي تحل الصراعات وتاخد قرارات على  أساس خواطر علاجية وأمور تحليلية لظواهر وحاجات كتير حوالينا من منظور مختلف. كلام عن الرجالة والستات والمعالجين..كلام عن الحب والجنس والإلحاد. أنا ما أقدرش أؤكد إنه الكتاب حلو لكن أقدر أؤكد إن كل إللي هيقرأ الكتاب هيلاقي نفسه فيه وهيستفيد ولو بحرف منه”.

الكتاب مفيد لكل القراء ولكنه مفيد جدًا للمرضى النفسيين لإنه بعد ما تخلص الكتاب لو إنت مريض نفسي وبتتعالج مع دكتور هتقدر ولو بشكل مبدئي تحدد هل المعالج أو الدكتور بتاعك شاطر ولا لأ وهل بيتبع معايير المهنة وأخلاقياتها ولا لأ، وده لإنه الكاتبة كشفت كتير من الأخطاء إللي بيقع فيها المعالجين مع المرضى بتوعهم زي المعالج الشيخ إللي مش بيقدر يفصل خلفيته الدينية وقت العلاج والمعالج المأذون إللي كل هدفه يحافظ على علاقة الزواج حتى لو كان مفيش فيها أمل وكمان كشفت وفاء في الكتاب كواليس مهنة العلاج النفسي بشكل ممتع وسلس.

الكتاب بيتكلم عن مواضيع كتير مهمة لأي شخص ومستحيل ما يكونش عندك فيها تساؤلات وأفكار زي الحب والموت والجنس والعلاقة مع ربنا والقلق وعلاقة الرجل والمرأة..

في النهاية بننصحك تقتني الكتاب ده لإنه أكيد هيفيدك وهيغير طريقة تفكيرك.