The Definitive Guide to Living in the Capital , Cairo , Egypt

بقى لنا كتيير مفتقدين مكان يكون بيعمل أكل حلو ومش دسم وفي نفس الوقت أسعاره كويسة، وفرحنا جدًا لما عرفنا أن المليجي اللي له أكثر من فرع في المعادي ومعروف بجمال الفراخ المحشية بتاعته. فتح في شارع الـ 50 في زهراء المعادي.

كنا فاكرين إن المكان دليفري بس، لكن بعد ما طلبنا الطلب عرفنا إن المكان فيه قسمين، قسم للمطعم للناس اللي حابة تاكل جوه المكان، وقسم تطلب طلبك وتاخده وتمشي أو تطلب دليفري. بس للأسف المكان اللي ممكن تقعد فيه مش ظاهر قوي.

بدأنا نشوف المنيو ولفت نظرنا الوجبات، واللي عبارة عن قطع فراخ معمولة بطريقة كنتاكي، مع بطاطس وعيش. واللي سعرها بيتراوح من 30 إلى 50 جنيه، بس إحنا حبينا نطلب أكتر حاجة مشهور بيها المكان. وطلبنا فرخة محشية بـ 90 جنيه، ونصف كيلو كفتة بـ 60 جنيه، مع بطاطس وطحينة كده كده بيجو مع الطلب.

الفراخ المحشية بتبقى محطوطة في فرن من زجاج قدامك عليه أكتر من سيخ بيلفوا فيه الفراخ وتقدر تختار اللي على مزاجك، وبيقدموا معاه بطاطس محمرة وعيش لبناني وطحينة مع الوجبة.

لازم نعترف إن ريحة وطعم الفراخ كانوا ممتازين خاصة إنها كانت بتدوب في فمك من كتر ما هي مستوية يادوب زي ما الكتاب بيقول، يعني لا هي نية ولا مطبوخة زيادة عن اللزوم. ده غير إن الخلطة جوه الفراخ مع الأرز كانت ممتازة وكان نفسنا تكون كميتها أكتر شوية علشان نستمتع بيها.

لكن المفاجأة الحقيقية بالنسبة لنا كانت الكفتة، كنا متوقعين إن بما إن ده مكان متخصص في الفراخ الكفتة ما تبقاش حلوة قوي، لكن المفاجأة إن الكفتة كانت أحلى من الفراخ، إحنا طلبنا كفتة كندوز مش ضاني، فكانت خفيفة وريحتها تجنن، مع الطحينة والعيش، طعم من اللي قلبك يحبه.

كان نفسنا نطلب أكثر من كده لأننا حسينا إن أغلب أكله حلو.

المليجي محل مشويات بيقدم لك أكلات ممتعة وشهية بأسعار مناسبة جدًا.