The Definitive Guide to Living in the Capital , Cairo , Egypt

“بوتشرز برجر” من الأسماء المشهورة جدًا لو جات سيرة أفضل أماكن البرجر في القاهرة، له فروع كتيرة جدًا وبينتشر بسرعة بس الغريب أنه فتح فرع جديد في الشيخ زايد رغم أن له فرعين تانيين، وبالتالي 3 فروع في نفس المنطقة كتير جدًا ومش فاهمين ليه، الأول عند الكرمة مول، والتاني في ويست تاون هب، والتالت اللي رحناه في مكان جديد فتح مؤخرًا اسمه Atrium Plaza أمام التوحيد والنور ومستشفى جلوبال.

المكان فيه حوالي 3 أو 4 كافيهات ومطاعم شغالة، هتلاقي بوتشرز برجر أول ما تدخل على أيدك الشمال في مكان مفتوح عبارة عن حاجة زي عربية طعام وأمامها ترابيزات وكراسي كتيرة، وبالتالي المكان كله Outdoor، لسوء حظنا أن يوم زيارتنا الدنيا كانت برد جدًا والهوا جامد فكنا سقعانين جدًا وإحنا قاعدين، على الرغم أن فيه دفايات في المكان بس ما كانتش كفاية وكان لازم نلزق فيها علشان نتدفى.

المنيو عبارة عن صفحة A3 مقواة فيها كل أنواع البرجر والستيك والطلبات الإضافية والحلو والمشروبات الخاصة بالمكان مافيش فيها جديد، جربنا 3 أنواع من البرجر: باربكيو بيكون (74 جنيه حجم كبير) وده عبارة عن قطعة برجر مع بيف بيكون مع جبنة وشرايح بصل مشوية وخس وديجون، وكمان جوسي لوسي (84 جنيه) وده عبارة عن قطعتين برجر عليهم شريحتين جبنة شيدر حمراء سايحة وChili Con Carne (لحمة مفرومة بالصوص والفاصوليا الحمراء) ومخلل وخس ومايونيز، وأخيرًا هاواين برجر (98 جنيه حجم Go Mighty) وده قطعة برجر عليها شرايح أناناس وترياكي صوص وخس، ومشروب غازي (14 جنيه)، وبسبب السقعة طلبنا شوربة اليوم وكانت مشروم بالكريمة (17 جنيه) علشان تدفينا شوية.

أول حاجة جات لنا كانت الشوربة، طعمها حلو جدًا وقوامها مضبوط وكريمي وفيها قطع مشروم متوسطة الحجم، عيبها الوحيد كان طعم الفلفل الأسود الزيادة اللي كان واضح جدًا وضايقنا، البرجر جالنا بعدها بفترة ولنا عليه كام ملاحظة، البرجر بينزل معاه بطاطس محمرة وسلاطة كول سلو، البرجر الجوسي لوسي كنا طالبين التسوية بتاعته Well done جالنا تسويته مش مضبوطة وكمان اللحم المفروم عليه من غير فاصوليا حمراء، على العكس برجر الباربكيو بيكون طلبناه Medium Well جالنا Well done، أما بقى الهاواين جالنا فيه حتت محروقة، الأكل بالنسبة لنا كان محبط شوية لأن كل أوردر كان لنا ملاحظة وده على عكس اللي اتعودنا عليه من بوتشرز، بس المكونات كانت فريش والبطاطس لطيفة.

في التحلية كنا محتارين بين Fried Ice Cream وشوكولات بومب (49 جنيه)، وعلشان نجري ريقكم الشوكولات بومب عبارة عن مولتن كيك (اللي قلبها شوكولاتة سايحة) عليها كرة من الشوكولاتة ولما بتصب عليها صوص شوكولاتة سخن بيدوب وينهار وتبقى الدنيا شوكولاتة في شوكولاتة، وبيُقدم معاها بولة آيس كريم فانيليا ومزين بصوص شوكولاتة من فوق، عرفتوها؟ أيوه اللي ماليه الفيسوك فيديوهات بتعقد وتجرى الريق.

الشوكولات بومب بالنسبة لنا كان حسن الختام، ضايقنا بس أن الجرسون هو اللي حط الشوكولاتة السخنة علشان يسيح الطبقة اللي فوق ودى تجربة المفروض إحنا نعيشها ونجربها، المولتن كيك كانت رائعة، غنية بطعم الشوكولاتة، وآيس كريم الفانيليا قلل من دسم الكيك والصوص، بجد كانت تجربة ملأت حواسنا وبسطتنا رغم أننا كنا متضايقين.

تجربتنا في بوتشرز برجر للأسف ما كانتش كاملة، فيه بعض النقط محتاجة تضبيط، ده شيء طبيعي لأن لكل جواد كبوة، بس المهم أنه يقف على رجليه تاني ويلحق المنافسة.