The Definitive Guide to Living in the Capital , Cairo , Egypt

الشتاء موسم محبب لينا رغم كل البرد والزكام والتكتكة، لبسه شيك مفيش كلام، ومتعة شرب العدس فيه متتوصفش، غير بقى مج الشوكولاتة العظيم وأنت تحت اللحاف! ضيف بقى لقايمتك هنا حاجة هتحببك بزيادة في الفصل القصير المتلج ده، أفلامه الجميلة اللي مليانة فن، خصوصًا الشتاء اللي على حق في الغرب وسط الجليد ورجل التلج.

يلا إلبس البالطو وتعالى ناخد جولة في أجمل أفلام الشتاء، واللي هتخليك تتكتك حتى وأنت تحت اللحاف.

The Chronicles of Narnia The Lion TheWitch And The Wardrobe  

(خيال وفانتازيا)

نبتدي بحاجة عائلية، خيالية لطيفة في عالم فانتازي غير عالمنا، سلسلة نارنيا مشهورة في النوع ده زيها زي هاري بوتر مع الفرق الكبير طبعًا في الشعبية والنجاح، لكن أحلى أجزائها فعلاً هو الأول بعنوان (الأسد والساحرة خزانة الثياب)، وهو أكتر جزء حقق نجاح في شباك التذاكر.

تخيل ان الدولاب في أودتك هو بوابة لعالم تاني أراضيه كلها جليد، بتقابل فيه حيوانات بتتكلم وساحرة شريرة، الفيلم كله بيتلخص في الطفلة (لوسي) اللي بتكتشف العالم ده، وهي اللي هتخليك مبسوط بكل مشاهدها لحد الآخر غصب عنك!

The Shining

(رعب)

نخش بقى على الرعب، ومش أي رعب كمان، الفيلم ده من الكلاسيكيات اللي بيتقاس عليها جودة الرعب عمومًا، التصوير والجو المخيف فيه مش طبيعي، المخرج اخترع أساليب جديدة كله بيمشي عليها لغاية النهاردة، فعلاً هترتجف من الخوف كمان مش بس من البرد!

القصة عن أب بيشتغل حارس فندق طول فصل الشتاء، معاه مراته وابنه الطفل بس، الفندق فاضي والتلج مغطي المنطقة بالكامل لدرجة أنك متعرفش تتحرك بالعربية أبدًا، لازم (كساحة الجليد) المخصوصة في الأماكن دي، الأب يدوب مبطل إدمان الكحوليات جديد والأم خايفة من نوبة جنون منه لكن كاتمة.

هنا طبعًا بنكتشف أن الفندق مش طبيعي، ومع تداخل هلاوس الأب المدمن وأشباح الفندق بتحصل المصيبة والرعب اللي عمرك ما هتنساه مع نهاية غريبة هتخليك تفكر شهر على الأقل!

The Day after Tomorrow

(نهاية العالم)

المرة دي هنعيش في مكان كله جليد بالكامل تاني، لكن في عالمنا أحنا مش عالم خيالي، الفيلم من نوعية نهاية العالم اللي بيحكي سيناريو فناء كوكبنا، ومش بنظام الحروب بين الدول، أو الكوارث البيئية المفاجئة زي الزلازل والبراكين، لكن الاحتباس الحراري اللي بيدوب الجليد ببطء.

الجليد هيغطي نيويورك كلها، وهتشوف ناطحات السحاب وتمثال الحرية تحت أكوام من التلج، كمان هيخوض البطل مغامرة صعبة عشان ينقذ ابنه وصحابه من الصقيع ده قبل ما يموتوا متجمدين، مهما كنت حاسس بالبرد فأكيد مش زي أبطال الفيلم ده!

Ice Age 3 dawn of the dinosaurs

(أنيميشن)

سلسلة أفلام العصر الجليدي معروفة لكل محبي الأنيميشن، دب كسلان ونمر منقرض وفيل ماموث ضخم، مغامراتهم الحقيقة مليانة جمال وسط حقبة في تاريخ كوكبنا كلها تلج، غير طبعًا  الكائن اللي شبه السنجاب ونفسه ياكل الثمرة طول السلسلة ومش عارف!

الجزء التالت يعتبر الأفضل بسبب كمية الضحك والتهييس الرهيبة فيه، هنا الأبطال الثابتين بيدخلوا عصر الديناصورات، وبتحصل مشكلة للدب الكسلان بتخليه في خطر من أضخم ديناصور على الأرض، لكن بتظهر شخصية جديدة عمرك ما هتنساها في الكوميديا والدماغ.

The Revenant

(مغامرة)

نختم مع تحفة ليوناردو ديكابريو اللي وصلته للأوسكار بعد مشوار طويل ومجهود ميخفاش على حد، كلنا عشنا حفلة الأوسكار 2016 ومنتظرين اللحظة اللي الممثل ده يستاهلها من زمن، والسر كان في الدب الشرس اللي بهدله في الفيلم لكن وصله للجايزة.

الفيلم ده نموذجي فعلاً عن الشتاء، البطل صياد فرو وسط الجليد ودي مهنة عتيقة في القرن الـ19، بيهرب من قبيلة هنود حمر متوحشة، عشان يقابله دب رمادي عملاق!، وصحابه بيخونوه وخلاص بيبقى على وشك الموت، الحقيقة هي مغامرة صعبة ومؤلمة لكن أكيد تستحق المشاهدة مع مج السحلب التمام.