The Definitive Guide to Living in the Capital , Cairo , Egypt

السوشي من الأكلات المفضلة لناس كتير ومن الأكلات المكروهة تمامًا لناس تانية، بس بما إننا في كايرو 360 من الفئة الأولانية فكنا لازم نروح موري سوشي في المعادي ونشوف أخباره إيه بعد أخر زيارة لينا ليهم واللي كانت من فترة.

المكان زي ما هو بديكوراته المميزة وإضائته الواضحة، لاقينا إضافات جديدة في المنيو منها أنواع سوشي بقطع من ستيك اللحمة أو الدجاج أو البط، ودي حلت المشكلة بالنسبة للشلة الصحاب اللي دايمًا يطلع فيهم واحد أو أتنين مش بيحبوا سوشي.

حبينا نجرب أنواع مختلفة من السوشي بطلبنا نوع مناسب للفيجيتريان بدون أي نوع سمك أو مأكولات بحرية وهو Mango roll بـ 30 جنيه.

ودي عبارة عن رول سوشي جواه أفوكادو وخيار وجبنة وعليه شريحة مانجو، طعمه مش وحش بس ضيع فكرة السوشي، وننصح الفيجيتريان أنه مايأكلوش سوشي ويرتاحو بدل ما يتعبوا نفسهم.

طلبنا كمان specila goma maguro platter  8 قطع بـ 86 جنيه، وده يعتبر ساشيمي قطع تونة على أطرافها سمسم أبيض وأسود، وكانت أجمل حاجة جربناها، خصوصًا مع الترياكي صوص، قطع سميكة لذيذة ومنعشة.

كمان جربنا Hot Indian roll 6 قطع بـ 80 جنيه، وده المفروض أنه بالتوابل الهندية ومقلي بس كان خيبة أمل كبيرة قوي بالنسبة لطعمه، علشان كل المكونات مفتتة والتوابل باهتة ومش متناسقة مع نوع السمك اللي جواها وكنا بنغرقها بصوي السويت أند ساور علشان نداري طعمها غير المتناسق.

كمان طلبنا Hot spicy lemon roll 8 قطع بـ 105 جنيه، وده من أجمل السوشي اللي جربناه طبقة كريسبي من بره عليها صوص حار من الليمون لونه برتقالي وجمبري من جوه وأفوكادو وكريمة.

برضه جربنا قطعة نيجيري كريسبي رايز بـ 20 جنيه، ودي عبارة عن رز عليه طبقة دقيق مقرمشة وقطعة جمبري فوقها، وكانت لذيذة جدًا.

 وقطعة gunkan hot goma sake  بـ 30 جنيه، ودي عبارة عن شريحة سالمون ملفوفة وعليها سمسم على الرز وفوقها قطع سالمون مفتتة حارة، وكانت تجنن من أجمل القطع اللي دوناقها ومتناسقة جدًا.

وكان لازم نشرب عصير منعش مع الأكل فطلبنا Mojito passion بـ 35 جنيه، وده عبارة عن سفن مع سيرب باشون فروت وليمون ونعناع بتخلطهم ببعض مع التلج المجروش وتستمتع بأكتر طعم منعش ولاذع ينعشك مع السوشي.

خلصت تجربتنا في موري سوشي بس الأكيد إنها مش هتكون زيارتنا الأخيرة لمكاننا المفضل لأكل السوشي اللي بيتميز بالحرفية والإبداع والخدمة الممتازة.