هل عمرو دياب “معدي الناس” في ألبومه الجديد؟
Cairo 360
كتب: محمد رجب
استمعنا مؤخرًا لألبوم عمرو دياب الجديد “معدي الناس” وكانت لنا بعض الملاحظات عليه.. اعرفوها معانا في السطور الجاية.
الألبوم بيشهد عودة التعاون الفني بين عمرو دياب وعمرو مصطفى بعد توقف استمر لسنوات بعد خلاف فني حصل بينهم، لكن زال الخلاف وفضل الفن علشان الجمهور يستمتع.
الألبوم بيشهد كمان تواجد مهم لمؤلف كلمات سعودي هو تركي آل الشيخ في سابقة بتحصل لأول مرة في تاريخ عمرو دياب، اللي قام بتلحيم الأغنية بنفسه.
أول أغنية “قلبي إتمناها” قنبلة فنية بكل المقاييس بيبدئها عمرو مصطفى بالسينيو مباشرة “وأنت وايايا ياما قولت إنشالله يا حبيبي إنشالله” السينيو ده يخلع قلبك من جوه وأنت بتسمعه.. لا يمكن تزهق منه وتتمنى لو إن كل الأغنية السينيو ده.. جملة موسيقية عبقرية لعمرو مصطفى لدرجة خلتنا نقول الحمد لله إنهم اتصالحوا علشان نسمع الحلاوة دي.
أغنية “قمر إيه” كلمات أسامة مصطفى وألحان سامر أبو طالب تنتمي لمزيكا الهاوس اللي ياما غنى بيها عمرو دياب قبل كده وكان أشهر أغنية هاوس ليه “نقول إيه” مشكلة الهاوس الوحيدة رغم إنه إيقاع يرقص أي حد إنما لما تسمع بيه أغنية جديدة تحس إنك سمعتها قبل كده علشان كده لو ماكنش التجديد كامل وشامل في الأغنية الهاوس الجديدة هتفضل محتار وتسأل نفسك يا ترى سمعت الكلام ده قبل كده فين.. واللي نيته مش صافية ناحية عمرو دياب هيقول لك بص أهو بيكرر نفس ألحانه تاني أهو.. لا يا جماعة ده هاوس والهاوس طبيعته كده ومهم في أي ألبوم إنه يبقى فيه أغنية هاوس وإلا يبقى ألبوم كئيب.
أغنية “آه حبيبي” كلمات هاني رجب وألحان مديح محسن إيقاع مقسوم معزوف على الأوكرديون.. عمرو بيحب المقسوم وهو واحد من أوائل المطربين اللي غنوا مقسوم إن لم يكن أولهم لأن المقسوم بيدي عمرو الفرصة كاملة إنه يستخدم أغلب طبقات صوته وده نلاحظه وهو بينقل من “آه حبيبي” في الطبقة الأعلى لـ “آه حبيبي” في الطبقة المتوسطة.. النقل ده ماينفعش يحصل غير مع المقسوم.. المقسوم إيقاع أساسي ماينفعش يطلع ألبوم لعمرو دياب بالذات من غيره.. في الآخر هي أغنية متواضعة فنيًا ولو مش صوت عمرو دياب نفسه كانت بقت أغنية سيئة.. نفس مشكلة الهاوس هي نفس مشكلة المقسوم إنه بيدي إنطباع إننا سمعنا اللحن ده قبل كده وده مش حقيقي طبعًا فعمرو دياب لا يكرر نفسه لكن للأسف دي طبيعة المقسوم.
أغنية “أول كل حاجة” كلمات أحمد المالكي وألحان عمرو دياب وسامح كريم.. فعلًا الأغنية دي محتاجة 2 ملحنين لأن المالكي كتب وأفاض واستفاض في شرح مشاعر تجربة الحب الأولى قد إيه هي تجربة حلوة وقد إيه هي تجربة مؤلمة لحظة الفراق لدرجة إنه قال “إنتي أول حد يمشي ودمعتي تنزل عليه” نعتقد إن التعبير ده حصل بالفعل وإن مشاعر مؤلف الكلمات لحظة كتابة الأغنية كانت مشاعر حقيقية إحنا نفسنا اتأثرنا بيها.
نيجي للأغنية اللي حيرت ملايين الشعب “أجمل عيون” أو كما عرفها الجميع بأغنية “برج الحوت“.. الأغنية كلمات السعودي تركي آل الشيخ وألحان عمرو مصطفى.. أغنية لايت تصلح كإهداء من أي رجل لأنثى برج الحوت لزوم التثبيت أو الهروب من هدية بجد.. وسواء الأغنية اتكتبت لآمال ماهر أو لدينا الشربيني فالموضوع ده مايشغلناش في حاجة دي تصرفات شخصية تندرج تحت بند الخصوصية وفي الآخر كل واحد حر يحب مين ويغني لمين.. اللي يهمنا هنا الجانب الفني وبصفتنا سميعة نقدر أقول إن الأغنية حلوة سواء على مستوى الكلمات أو اللحن أو التوزيع.
عودة مرة أخرى للمقسوم مع أغنية “ماسكلي في نغمة الحرمان” ومن قبل ما نقرأ مين كاتب الكلمات توقعنا إنه أكيد أيمن بهجت قمر لأن دي طريقته ودي سكته الكلمات الفاقعة اللي تخبطك في ودنك زي الطوبة.. في الأغنية دي أيمن بهجت قمر بيخبط في الست اللي دايمًا بتشتكي بطريقة “عمري ما شفت معاك يوم عدل” والستات اللي من النوعية دي عددهم كبير ومنتشرين في كل شرائح المجتمع فاستحقوا أغنية تعرفهم غلطهم من الأستاذ عمرو دياب شخصيًا.. يالله هم هيروحوا من ربنا فين.
مرة تانية مع الهاوس والجيتارات “وأنا جنب حبيبي” السينيو حلو والجملة الموسيقية حلوة.. الأغنية بتوصف حالة الحبيب بجوار الحبيبة موضوع اتهرس في 18 ألف أغنية قبل كده لكن ماينفعش ألبوم غنائي يطلع من غير ما أغنية فيه توصف حلاوة وجمال الحب في حضرة الحبيب.. الأغنية تقدر تعتبرها كمالة عدد ولما هتسمعها مش هتفكر تعيدها تاني هي مش على نفس مستوى أي أغنية في الألبوم كله بس في الآخر هي أغنية كويسة وفيها مجهود في التلحين والتوزيع وعادي يعني لو سامحنا عمرو في أغنية مش قد كده.
أغنية “حبايب إيه” كلمات تامر حسين وألحان مدين إحنا مش فاهمين هم عايزين إيه الصراحة كلمات غامضة ولحن ركيك وتوزيع مافيهوش أي تجديد إحنا سمعنا الأغنية كذا مرة حاولنا نفهم أي شيء مفيد أو معنى منتظم أو حتى جملة موسيقية تشد الودان مالقناش أي حاجة خالص من الكلام ده.. يعني في أول الأغنية بيقول “بنلقى راحتنا وايا الغُرب ومش وايا حبايبنا” “مريحناش يا قلبي القرب بنرتاح إحنا في بعادنا” “حبايب إيه حبايب مين” وكلام كتير يرقي لمستوى موضوع تعبير طالب في ثانوية عامة.. الأغاني الدرامية والفن عمومًا لازم يكون واضح لازم كمتلقيين نفهم سيادتك تقصد إيه وطالما أغنية لازم يبقى في جملة موسيقية حلوة تشد الودان إنما الغناء بطريقة التعديد وندب الحظ والبكاء على الظروف والأيام السوداء ده كلام مياتم.. الأغنية هي فن البهجة وليس الغموض أو العكننة.. يمكن النوع ده من الأغاني في ناس بتحبه على اعتبار إن في ناس كانت ولازالت بتحب أغاني مصطفى كامل الأكثر غموضًا وعكننة.
أغنية الهيد “معدي الناس” كلمات أسامة مصطفى وألحان سامر أبو طالب.. تم اختيارها هيد الألبوم .. هي أغنية لطيفة وتعبير معدي الناس أول مرة حد يستخدمه في أغنية.. الأغنية بتبدأ بتوزيع للسقفة المفضلة عند عمرو دياب.. وتستمر الأغنية بنفس الإيقاع من غير أي نقلات سواء للإيقاع أو المقام أو التمبو.. هي أغنية لطيفة بيقول فيها عمرو معدي الناس بإحساسك وبالرقة اللي جوه عنيك .. لكن أكتر من اللطافة مافيش حاجة تاني ممكن نقولها هي مش أحسن أغنية في الألبوم ولا من أحسن أغاني عمرو دياب عمومًا ومش عارفين الصراحة ليه تم اختيارها هيد الألبوم ده.
آخر أغاني الألبوم “أحلى حاجة” كلمات تركي آل الشيخ وألحان عمرو دياب.. مقدمة وترية طويلة بيظهر فيها صوت الإليكتريك جيتار واضح ومميز.. لحن شرقي أصيل وتقيل وكأنه لحن لبليغ حمدي وكأن وردة هي اللي هتغني.. وفجأة يطلع علينا عمرو دياب ونتفاجئ بأنه بيغني شرقي قديم حلو جدًا وده مش جديد على عمرو واللي متابع عمرو هيفتكر وهو بيسمع “أحلى حاجة” أغنية “حبيبي يا عمري أنا كلي جراح”.. واللي مايعرفش قيمة عمرو دياب كملحن هنفكره بس بإن أغنية “أيوة أنا عارف إن كلامي عليها كتير” كانت من ألحان عمرو دياب.. عمرو غير إنه مطرب شاطر هو ملحن رائع.. “أحلى حاجة” أغنية حلوة تسمعها وتتسلطن.. وفي رأينا إن عمرو دياب عمل الأغنية دي عشان يتحدى بيها نفسه ويقول أنا أهو بعرف أعمل أغاني شرقي رزينة بعرف أعمل أغاني السهر والسلطنة.
ملاحظات سريعة على الألبوم..
تفضل أحلى أغنية بلا منازع هي أغنية “قلبي إتمناها” بالسينيو العبقري “إنشالله”.. ومرة تانية كويس إن التعاون بين العَمرين مصطفى ودياب رجع تاني.
المفاجأة الحقيقية في الألبوم ده واللي رفعت من مستوى كتير من أغانيه هو صوت عمرو دياب نفسه وآدائه الغنائي رفيع المستوى.. الراجل لسه محافظ على صوته خامة وجودة وده نتيجة إهتمامه بنفسه اللي بيشتغل عليها طول الوقت.. بينام بدري ويصحى بدري بيلعب رياضة بشكل منتظم والأكيد إنه بيقوم بتدريبات صوت مش بس علشان يحافظ على مستواه كمطرب إنما فعلًا صوت عمرو دياب بيتطور للأفضل.
عادة عمرو دياب لم تتغير في استخدام صوته كخلفية “كورال” لنفسه.. العادي إن أي مطرب بيستعين بكورال مختلف للخلفيات لكن عمرو لسه هو نفسه الكورال من أول ألبوم لغاية “معدي الناس”.
لسه عمرو بيثير الإهتمام والفضول بألبوماته.. لسه الناس بتستنى الجديد بتاعه.. لسه الجيل اللي اتولد واتربى على أغانيه مكمل معاه.. ودي مش حاجة سهلة إنك تنجح وتحافظ على نجاحك لأكثر من 35 سنة.
الحاجة الوحيدة اللي نقدر نقولها وننهي بيها المقال هي إن مواضيع أغاني عمرو دياب دائما وأبدًا تدور في فلك العلاقات العاطفية وكأن كل المواضيع اللي ممكن نغني لها خلصت ومفيش غير الضحكة والعنين والرموش وأول مرة قابلتها وآخر مرة شفتها.. أكيد في مواضيع تانية تستوجب ألحان تانية ممكن يقدمها عمرو دياب.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
