أكشاك الكتب.. فكرة لنشر الثقافة والمعرفة قريبًا في القاهرة
Mohammed Sabry
على طول بنتعامل مع أكشاك البقالة في كل مكان، علشان نشتري منها حاجات زي العصير أو البيبسي أو بسكوت.. إلخ. لكن عمرك فكرت إنك تروح كشك علشان تاخد منه كتاب؟ هي دي الفكرة اللي قائم عليها مشرع “أكشاك الكتب”.
الفكرة دي ظهرت من حوالي سنتين، لما د. أبو الفضل بدران، رئيس هيئة قصور الثقافة، طرحها كوسيلة لنشر الثقافة بين المواطنين. وده من خلال وضع أكشاك للكتب في محطات المترو والأتوبيس والقطارات، والأماكن العامة. علشان الناس تقرأ وتتثقف.
ومؤخرًا الفكرة اتطرحت مرة تانية على إيد الشاعر/ أشرف عامر، القائم بأعمال الهيئة. وقرر عرضها على وزير الثقافة، لتنفيذها.
الفكرة بتقوم على وضع أكشاك من الزجاج، جواها كتب من الجهات الحكومية. ومختومة بختم خاص بالمشروع. ويقدر كل واحد ياخد أي كتاب مقابل 5 جنيه كحد أقصى. وبعد ما يخلصه يقدر يبدله من نفس الكشك، أو أي كشك تاني. أو ممكن يحتفظ به. وبالطريقة دي هيزيد عدد القراء بشكل كبير في وقت قياسي.
وعمالة الأكشاك هتكون من موظفين الهيئة. يبقى في 3 موظفين بيتناوبوا على كل كشك. هيختاروا الأكشاك القريبة من بيوتهم، وهيكون لهم مكافآت على شغلهم.
فكرة زي دي بسيطة جدًا وتنفيذها سهل. في نفس الوقت النتيجة بتاعتها هتكون إيجابية وملحوظة بشكل كبير. وهتساعد في نشر الثقافة بين كل أفراد المجتمع بكل اختلافاته. نتمنى إنها تنجح علشان نشوف مصر أحلى.
يا ترى الفكرة دي هتتحول لحقيقة وواقع قريب في القاهرة؟ نتمنى
