The Definitive Guide to Living in the Capital , Cairo , Egypt

الحلويات في رمضان بيكون لها طعم مختلف عن باقي السنة ما بين الكنافة والبسبوسة واختراعات البسبوسة بالريد فلفت والكنافة بالمانجو وأنواع الفاكهة المختلفة واللي أعطت نكهة غربية على الحلويات الشرقية، وبدأت من كم سنة وبقى فيه تنافس ما بين محلات الحلويات الكتير على أنواع الكنافة الجديدة وجودتها وأسعارها.

ولابوار السنة دي قدم لنا أكتر من حاجة جديدة عن السنة اللي فاتت زي أم علي بالتوت (200 جنيه) والكنافة بالكراميل المالح سولتد كراميل (200 جنيه)، والكنافة بالراسبيري (200 جنيه)، وطبعًا كوبايات الكنافة الصغيرة بأنواع الفاكهة المختلفة سواء مانجة أو توت أو شوكولاتة الواحدة بحوالي 28 جنيه.

وما بين أصناف السنة اللي فاتت زي العثمانلية وتورتة الكنافة بالمانجو (280 جنيه) والجديد شوية الرواني بالمانجو والراواني بالبلح والكراميل والمكسرات، حبينا نختار نوع مختلف شوية من تورتة الكنافة بالمانجو العادية وهي  طبق كنافة بالمانجو كانت في طبق بايركس فيها طبقتين مانجو من تحت وفوق (280 جنيه)  وكان زيها نفس الشكل والحجم بس البلح والكراميل.

الطبق كان حجمه متوسط يكفي 10 أشخاص تقريبًا، وكمية المانجو كانت كبيرة بس للأسف ماكنش موجود قطع مانجو كتير في الطبقة الثانية مجرد الكريمة الممزوجة بالمانجو وقطع المانجو نفسها ماكنتش طازة قوي، كنا نتمنى جودة أعلى من كده من مكان زي لابوار.

برضه لابوار ما يخلاش من الحلويات الشرقية، واللي بتتباع بالكيلو أو بالعلبة، وفيه منها كنافة بالنوتيلا، أو بالمانجو.

لو عاوزين تعرفوا معلومات اكتر عن اللي بيقدموا لابوار السنة دي تابعوا صفحتهم على الفيسبوك هنا.