The Definitive Guide to Living in the Capital , Cairo , Egypt

مش أي حد بيكون عنده فكرة حلوة بيقدر أنه ينفذها ببراعة وتمكن. لكن في o story باليه ستوديو قدروا بعد ما تميزوا في نشاطهم الأساسي اللي هو دروس الباليه واللي كنا كتبنا عنهم قبل كده هنا، قدروا يقدموا لنا تجربة أكل مختلفة ومميزة.

المكان بيقدم أكل كوري عادي ما بين سوشي وأرز بالخضروات، ومكرونة بعجينة البطاطس أو عجينة الأرز، وما بين أكل كوري صحي من غير زيت أو دهون. تخيلوا سوشي كاليفورنيا بار مثلًا من غير جبنة وهنا اللعب كله.

المنيو متنوع جدًا وغني ويقدر اي حد مش مشترك في o story يروح يجرب ويطلب إللي هو عاوزه أو يتصل ويطلب الأكل دليفري في المقطم. ده غير أنهم كل فترة بيعملوا عروض لوجبات مجمعة زي الـ healthy box واللي مليان حاجات صحية منها السوشي وبحوالي 50 جنيه بس.

طلبنا Tteokbokkit بـ 60 جنيه، و Japchae Korean mixed noodles بـ 70 جنيه، وMandu  بـ 50 جنيه، وكمان سوشي بـ 50 جنيه.

الـ Tteokbokkit ده عبارة عن صوابع من عجينة الأرز قوامها شبه التوفو شوية بس طعمها جميل مع صوص أحمر حراق ومسكر في نفس الوقت يجنن.

كمان الـ Japchae واللي هو عبارة عن نودلز بعجينة glass noodles ومعاها خضروات كتير منها الفلفل الألوان والماشروم والذرة عملت مزيج رائع لا يقاوم خاصة لو أنتم جعانين.

أما السوشي فالحقيقة إننا اتفاجئنا من جماله ومن أنه مقدم بنفس جودة المطاعم المحترفة وده شيء يحسب لهم أكيد. كمان الماندو واللي هو شبه القطايف عندنا بس بعجينة مالحة وجواه لحم مفرومة وخضروات، فكانت التتبيلة بتاعته رائعة خاصة كمان لو اتغمس في صوص الـ Tteokbokkit.

الأسماء بتاعة الأكلات ممكن تكون صعبة شوية بس اللي مش هيختلف عليه أثنين هو الطعم الرائع والمميز.

إحنا جربنا حاجات قليلة من منيو كبير بس الأكيد إنها مش هتكون زيارتنا الأخيرة. وتقدروا تتواصلوا معاهم من خلال صفحتهم على الفيسبوك هنا.