5 حاجات عن مسلسل “في اللالا لاند”
Hager Eissa
عشاق الكوميديا على موعد مع مسلسل “في اللالا لاند” وهو من بطولة دنيا سمير غانم اللي أثبتت نفسها ككوميدية ناجحة في السنوات الأخيرة. تعالوا نتعرف مع بعض على شوية معلومات عن المسلسل.
اسم المسلسل
المسلسل كان اسمه “الضايعين” وتم تغييره في أثناء التصوير إلى “في اللالا لاند”، وعلى فكرة المسلسل مالوش أي علاقة بالفيلم الشهير “لالا لاند” واللي حقق إيرادات ضخمة وفاز بأكثر من جائزة أوسكار.
قصة المسلسل
أول لما تشوفوا البرومو الإعلاني للمسلسل علي طول هتربطوا بينه وبين المسلسل الأمريكي المعروف “lost” واللي كان بيتعرض في سنة 2004 وكان بيحكي عن سقوط طائرة وتم إنقاذ 50 فرد منهم وحاولوا يعيشوا ويتعايشوا علي الجزيرة وطبعًا كان كل تفكيرهم إزاي يخرجوا من الجزيرة ويرجعوا لحياتهم الطبيعية وهو ده تقريبًا نفس قصة المسلسل مع تغيير أحداث كتيرة وتزويد جرعة الكوميديا.
مكان تصوير المسلسل
تم تصوير المسلسل في بلاتوهات داخل مدينة الإنتاج الإعلامي تحديدًا داخل حي جاردن سيتي، وكمان تم تصوير بعض المشاهد في شوارع القاهرة والجزء الأكثر متعة هو عندما قام فريق العمل بالانتقال إلى تايلاند لتصوير الأجزاء الخاصة بسقوط الطائرة علي إحدى الجزر التايلاندية، وده طبعًا الجزء اللي كلنا مستنينه لأن كلنا عارفين أن الطبيعة هناك مبهرة بكل تفاصيلها.
ممنوع السيلفي
الفنانة دنيا سمير غانم اشترطت علي كل فريق العمل الامتناع عن أخذ السيلفي في أماكن التصوير ولحد بداية عرض الحلقة الأولى، وده لحرصها الشديد علي التكتم علي أحداث المسلسل وكواليسه، وعلشان ماحدش يسرق الفكرة.
أجر دنيا سمير غانم
حصلت دنيا سمير غانم على 30 مليون جنيه مقابل بطولة العمل، وده بسبب نجاح أكثر من عمل لها في السنوات الأخيرة.
