The Definitive Guide to Living in the Capital , Cairo , Egypt

تصوير: فتحية السيسي

رمضان قرب، وفيه أماكن جميلة هتخليك تحس بجمال الشهر الكريم، ومنها شارع المعز، اللي كثير مننا بيروحه لكن مش بيستمتع أو بيعرف كل المعلومات التاريخية والثقافية الخاصة بالمكان. فقولنا ناخدكم في جولة مصورة لشارع المعز ونعرض عليكم جمال الشارع بعيون #كايرو_360.

في الأول خلونا نوضح أن الشارع مش زي ما معظم الناس فاكرين بيبدأ من ناحية سيدنا الحسين، الشارع بيبدأ من أبعد من كده بكتير من عند بوابة الفتوح وبيمر بعد كده بمنطقة الغورية وبيقطعه شارع الأزهر لحد ما يبدأ من جنب منطقة الحسين. والجميل أن كل الآثار السياحية اللي في الشارع تقدر تشوفها بتذكرة رمزية بحوالي 5 جنيه، إلا متحف المنسوجات والأقمشة وبيت السحيمي ليهم تذاكر منفصلة.

لو بدأت جولتك من شارع الأزهر هتلاقي على شمالك منطقة الغورية والبياعين اللي بيبعوا كل حاجة من أول الملابس لحد البطاطين والكوفرتات وأغطية السرير. بتمشي شوية بتلاقي سبيل محمد علي.

ومسجد المؤيد جنب بوابة الفتوح، واللي بيشبه جدًا في بناءه ومعماره جامع السلطان حسن وجامع محمد علي في العواميد.

أما لو بدأت من الناحية المعتادة من جنب منطقة الحسين هتعدي على بياعين عطارة كتير وأكسسوارات وجلاليب فلكلورية.

تقريبًا في نص الشارع بيبدأ أول مكان أثري تزوره وهو مسجد ومدرسة السلطان قلاوون وبتقطع تذكرتك لجميع الأماكن الأثرية من عنده.

بعده بكام خطوة هتلاقي مسجد السلطان برقوق واللي مميز بممر خاص بيه ملون بدوائر زرقاء، والسقف الخاص به قادر أنه يرجعك لعصر المماليك اللي بنوا المسجد، كأنك بتشوف نسخة ملونة من مسجد السلطان حسن مع فرق أن مسجد السلطان حسن أكبر حجمًا طبعًا.

بعد كده هتلاقي على إيدك اليمين مسجد الأقمر واللي كتير مايعرفوش عنه حاجة لأن مدخله نازل كام سلمة لتحت، وبرغم أنه لسه محتفظ بجمال النقوش اللي فيه إلا أن إيد الإهمال طالته زي ما طالت أغلب المساجد في الشارع.

أما بخصوص الممر الخاص ببيت السحيمي واللي لو كملت فيه شوية هتلاقي مدرسة “بيبرس  البندقداري” اللي هتلاقي فيها أكبر تجمع للعصافير والحمام لأن خدام المسجد بيهتموا بيهم ده غير أن المسجد سقفه مفتوح.

بعد ما تمشي حبة حلوين هتلاقي جامع “الحاكم بأمر الله” اللي أكتشف مؤخرًا وبرغم جماله وسقفه الواسع المفتوح اللي بيديك إحساس بالبراح إلا أنه كان بيستخدم مخزن للتجار زمان، تخيلوا الجمال ده كله كان مهمل إزاي. هم حاليًا بيطوروا فيه وبيصحلوا كل شوية فبيكون فيه أثر للمعدات وأماكن التصليح.

بعد كده في نهاية الشارع هتلاقي بوابة باب زويلة واللي فيه ضريح الشيخ “الذوق” واللي قرر يخرج من مصر زمان بسبب أنه لقى الذوق العام قل في مصر ولكن شاء القدر أنه يموت على البوابة وفعلًا تم دفنه هناك علشان كده الناس دايمًا بتقول الذوق ماخرجش من مصر.

نصائح عامة:

وأنت ماشي في الشارع خلي معاك إزازة مياه لأنك مش هتلاقي أماكن كتير تقدر تشتري منها، أما بالنسبة للأكل فما بين محل الكبدة أو السمك إحنا اكلتنا المفضلة هناك الفطير السادة وتقدروا تجربوا البيتزا أو الفطير بالخضار.

لو أنت من محبي التصوير خلي بالك أن تصوير الفيديو باستخدام مايك ممنوع إلا بتصريح، خاصة لو معاك كاميرا محترفة أو حامل للكاميرا فأنت كده كأنك بتهرب مخدرات ولازم ولابد وحتمًا تجيب تصريح من وزارة الآثار في العباسية.