The Definitive Guide to Living in the Capital , Cairo , Egypt

من أصعب الحاجات في مصر أنك تغير مفهوم الأكل الصحي عند الناس، وخصوصًا إن المطاعم مش بتعمل اللي عليها، ومعظمهم ماشي على نفس الفكر وهو فراخ مشوية ومعاها شوية خضار سوتيه، أو لو المكان جايب من الأخر ومقطع بطاقته هتلاقيه بيعمل سلاطة كينوا. الفكرة دلوقتي إن عدد من المطاعم قرروا يعرفوا الناس بالمعنى الحقيقي للأكل الصحي، ومنهم “Be Good To You” اللي يملكه علي مظهر، مدرب اللياقة البدنية المعروف ومؤسس BeFit.

مطعم Be Good To You موجود في الكلوب هاوس الخاص بقطامية هايتس، وفيه قعدة مريحة جوه المكان مع قعدة آوت دوور على حمام السباحة تعتبر من أحسن الأماكن للاستمتاع بوجبة فطار حلوة. يمكن المكان من جوه بسيط بس معمول فيه شغل، يعني عندك ترابيزات وكراسي عاليين، وجنبهم ترابيزات عادية وكراسي بألوان مختلفة، وترابيزات تانية قصادها كنب مع ترابيزة زي البوفيه المفتوح عليها مياه وكوكيز وقطع كيك موز وعلب عصير وحاجات تانية، ومعاهم كمان بار عصائر.

عجبنا في المكان لمسات الخشب الشيك والأرضيات الرمادي، وكمان سلة الفاكهة على بار العصائر والنباتات الصناعية اللي بتغطي الأسقف؛ يمكن بس استخدام المقولات التشجيعية المكتوبة على الحيطة كان زيادة شوية.

موضوع المقولات كمان موجود في المنيو اللي كل قسم فيها له عنوان مميز. معظم الأطباق الموجودة في المنيو خالية من الجلوتين ومنتجات الألبان ونباتية، وكل حاجة منهم مكتوب قصادها اختصار معين؛ يعني GF مثلًا معناها خالي من الجلوتين.

نبتدي مع وجبة البرانش الصحية مع Feel Good Fish Tacos  (ثمنه 110 جنيه). هو الموضوع ببساطة عبارة عن قطعتين عيش تورتيلا مقرمش خالي من الجلوتين مع خلطة تحفة من مكعبات السالمون الطازة وشرائح فلفل حراق رفيعة عليهم صوص ثوم وكزبرة، وبعدين بيحطوا عليهم مايونيز وبذور سمسم. يمكن الأكلة دي مالهاش علاقة بالتاكو خالص، بس عجبنا طعم الأكل القريب جدًا من سلاطة المحار ceviche خصوصًا لما تضيف عليه رشة ليمون. بصراحة الطبق كان كريزة اليوم.

نروح على Skinny Benedict (ثمنه 88 جنيه) الخالي من منتجات الألبان والجلوتين، وهو عبارة عن عدس مستوي كويس وتتبيلته روعة مع شريحتين قرع مشوي ومعجون كرنب – هو كان كرنب مشوي بصراحة – وعليهم ثلاث بيضات مسلوقين وصلصة توفو هولانديز. يمكن شكل التقديم ماكانش على مستوى التوقعات، بس البيض كان شكله تحفة والصفار سايح منه وصلصة التوفو هولانديز كانت ممتازة وزي ما توقعناها.

حاجة تانية خالية من الجلوتين والألبان هي تشيكن ساندويتش (70 جنيه)، معاه بطاطس ويدجز مستوية كويس وسلاطة جرجير، أما الساندويتش نفسه فيه مربى فلفل ومعجون كرنب تاني وجواكامولي وفراخ طرية جدًا. طبعًا بالنسبة لناس ماشية على نظام غذائي صارم مش هنقدر نشتكي من حاجة في الساندويتش، بس عمومًا هو محتاج شوية توابل ونكهة أقوي، ويا ريت لو شوية فراخ زيادة.

لما وصلنا للحلو أول حاجة قررنا نجربها من غير تفكير هي Apple Almond Crumble (ثمنه 55 جنيه)، عبارة عن شرائح تفاح مشوي لذيدة وأنواع توت مختلفة – التوت مش مكتوب في المنيو بس عمل طعم هايل – وطبعًا شوية لوز حلوين. الطبق كمان معاه آيس كريم توت طعمه تحفة، بس كان متجمد شوية. هو الطبق كطعم كان تحفة بس ناقصه الطعم المسكر، وممكن ما يدخلش دماغ الناس اللي بتحب الحاجات المسكرة.

طلبنا كمان  Smoothie Bowl (ثمنه 55 جنيه). هو الطبق ده غالبًا معمول علشان يتصور وينزل على إنستجرام؛ هو ببساطة عبارة عن سموزي بنجر وفواكه وزبادي وموز نص مجمد عامل زي الآيس كريم وبذور شيا وبذور كتان وجرانولا –حلم كل عشاق الحلويات اللي زي حالاتنا بيتحول لحقيقة. خلي بالكم إن من الصعب تلاقي بذور شيا وكتان في المطاعم المصرية، وعمومًا إحنا عجبنا طعم الطبق المسكر والمكسرات الجميلة.

لو هنقول على مطعم يقدر فعلًا يخلي أهل القاهرة يحبوا “الأكل الصحي”، فأكيد Be Good To You هيقوم بالمهمة. جايز الأسعار تكون غالية شوية، بس أكيد هنرجع عشان نستمتع بالأجواء الجميلة و”تاكو”والسمك والسموزي الرائع.