The Definitive Guide to Living in the Capital , Cairo , Egypt

لما سمعنا إن أول مطعم جنوب أفريقي هيفتح الشهر ده في المعادي ماكدبناش خبر وعملنا اتصالاتنا فورًا لحضور يوم الافتتاح. مطعم زولو يملكه زوجين من جنوب أفريقيا عايشين في مصر وعايزين يقدموا أكل بلدهم للسوق المصري اللي بدأ بمرور الوقت يستضيف مطابخ جديدة ومختلفة.

تنويه: إحنا مانعرفش أي حاجة عن مطبخ جنوب أفريقيا. بجد ولا أي حاجة. كل اللي نعرفه إن أكلهم حلو.

زولو فتحوا على شارع 100 قريب جدًا من كورنيش المعادي في نفس المكان اللي فتح فيه زمان تيبسي تي بوت وكايرو سيلر وLe Petit Swiss Chalet وكلهم من الأماكن اللي كان لها معزّة خاصة عند أهل المعادي، بس للأسف ماقدروش يكملوا المسيرة. المكان من جوه مدهون بدرجات ألوان أزرق فاتح وأحمر وبني، وفي الركن متعلق علم جنوب أفريقيا وسط أقنعة أفريقية وغيرها من تقاليع الأفارقة، وفي الخلفية سامعين صوت المغنية الجنوب أفريقية ميريام ماكيبا.

أول حاجة كانت المقبلات وهي تشيبس أند تشيز أند أونيون ديبز chips and cheese and onion dips  ودي ثمنها (30 جنيه) وبيري بيري تشيكن ليفر (40 جنيه) مع زوكيني فريترزzucchini fritters وثمنها (35 جنيه) واشتركنا في tipsy teapots of Limeys بـ (120 جنيه) – جين وسبرايت وليمون –وساوث أفريكان (120 جنيه) – آيس تي وعصير تفاح وروم. صوص الجبنة بالبصل كان تحفة بس يا ريتهم كانوا عملوا المقرمشات بنفسهم بدل الحاجات الجاهزة. الفريترز كانت سخنة مولعة وغرقانة صوص زبادي، وبالمناسبة دي نحب نوجه أحلى تحية لنفسنا علشان أكلنا أكل صحي؛ هو أي نعم الكوسا كانت مقلية، بس إحنا مبسوطين. عجبنا في البيري بيري التتبيلة والطعم المشطشط، وكمان الدويتو بين الكبدة وعيش الذرة اللي مع الطبق كان روعة. الفكرة بس إننا مش من عشاق الكبد اللي لونها وردي وبنحبها مستوية كويس، لكن جايز تكون غلطتنا عشان ماوضحناش النقطة دي للجرسون.

أما الأطباق الرئيسية فكانت برجر نعام ostrich burger ب (100 جنيه) 200 جرام، وده قطعة لحمة كبيرة عصارية بتوت بري بلسمي وبطاطس ويدجز كبيرة وسيخ خضار، مع طبق تشيكن كاري (80 جنيه) عبارة عن عيش توست مفرغ ومحشي كاري، وأخيرًا طبق lamb chops بـ (160 جنيه) 400 جرام، وده معاه ويدجز وأسياخ خضار.

قطع اللحمة الضاني في الطبق الأخير كانت روعة وعرفنا إنها مشوية على الفحم من ريحتها اللي تفتح النفس، وبصراحة الطبق بشكل عام كان هايل بس من رأينا إنه محتاج صوص أقوي شوية من الزبادي عشان نغمس فيه الويدجز. برجر النعام برضه يستحق تحية كبيرة، وكلنا كنا متفقين إن زولو يستحق زيارة تانية عشان برجر النعام واللحم الضاني.

نقدر نقول إن أسعار زولو معقولة، خصوصًا إن كل واحد فينا دفع 300 جنيه في مجموعة أطباق مقبلات ومشروبين وأطباق رئيسية، وده يعتبر كويس جدًا بالمقارنة مع جنون الأسعار اللي شايفينه اليومين دول. النقطة دي مع الخدمة الممتازة المهذبة يعتبروا نقطة انطلاق هايلة لزولو، ونتمنى إنهم يتخلصوا من لعنة المكان ده ويفضلوا موجودين على الساحة.