The Definitive Guide to Living in the Capital , Cairo , Egypt

الصورة لـ فتحية السيسي

بعد الأساطير اللي انتشرت مؤخرًا عن خروجات الشِّلَل في مصر وأد إيه الموضوع بيبقى صعب وترتيباته بتبقى ماراثونية وسكتها سكة فرهدة ووجع دماغ.. حسينا أنه مهم نقدم لكل راس في شلة دليل يحسم الجدليات الكبرى بتاعت: “هنتقابل امتى يا شباب؟”.. “هنروح فين يا رجالة؟”.. “هنعمل إيه يا جماعة؟”.. “اتفقتوا على حاجة؟”.

الدليل اللي هيبقى عبارة عن “منيو” للوجبات الفنية صاحبة المواعيد الثابتة والتكرار الدوري في قاهرة المعز، بحيث أن كل ما النفس تيجي على خروجة يبقى عندنا حبة اختيارات جاهزة ولطيفة تخلينا مانتعبش نفسنا في التفكير وتوفر علينا ماراثون أخد القرار.

التنورة

كل يوم سبت واتنين وأربعاء من كل أسبوع في تمام السابعة مساءً في وكالة الغوري بمنطقة الأزهر، عرض فرقة التنورة التراثية اللي بتقدم الرقصة الصوفية الشهيرة اللي بيتم إرجاع أصولها للشيخ الصوفي الكبير جلال الدين الرومي وفلسفتها بتقول أنه الكون كله بيدور فالإنسان في محاولة الوصول للصفاء الداخلي محتاج ينسجم مع الكون في دورانه بهذا الشكل.. العرض مش بتختلف مواعيده غير في رمضان بس علشان مواعيد صلاة التراويح فبيبقى متأخر شوية أو بيتم إلغاؤه في حالة وجود ليلة إنشاد أو حاجة كده، تذكرة حضوره 5 جنيهات بس للمصريين، وللأجانب 30 جنيه.

أوركسترا القاهرة السيمفوني

كل يوم سبت في تمام الثامنة مساءً في المسرح الكبير بدار الأوبرا، والحضور بالزي الرسمي طبعًا، جو لطيف جدًا لأصحاب الذوق الرفيع والمزاج الموسيقي الراقي، سيمفونيات كلاسيكية على كل شكل ولون، أسعار التذاكر للطلبة بتبدأ من 15 جنيه، وبالنسبة لغير الطلبة بتبدأ من 25 جنيه.

الحضرة

طقوس وأجواء الحضرات الصوفية المصرية بتتنقل من الجوامع والساحات للمسارح والمراكز الفنية، الجمعة الأولى من كل شهر في مركز الربع الثقافي في شارع المعز، والجمعة الثالثة أو الأخيرة من كل شهر في ساقية الصاوي بالزمالك، تابعوا الفعاليات وأخبارها من هنا.

أم كلثوم تعود من جديد

الخميس الأول من كل شهر في ساقية الصاوي بالزمالك، الحفل الشهري للست أم كلثوم اللي بيقدمه مسرح الساقية للعرائس، الحفل بيبقى منقسم لعرضين، الأول 6:00 مساءً، والتاني 8:0 مساءً، تابعوا الفعاليات وأخبارها على موقع الساقية من هنا.

عروض مركز المصطبة للموسيقى والفلكلور الشعبي

مركز المصطبة بينظم عروض فنون شعبية مختلفة على مسرح الضمة في وسط البلد بانتظام، زي: الخميس الأول من كل شهر حفل فرقة الطنبورة البورسعيدية اللي بتقدم الفن السواحلي البورسعيدي، والسبت الأول من كل شهر فرقة أسياد الزار اللي بتقدم فن الزار الشعبي، وغيرهم، والعروض كلها بتبدأ إما في الثامنة أو التاسعة مساءً حسب الحفل، تابعوا الفعاليات واعرفوا أخبارها من هنا.

عروض المركز المصري للثقافة والفنون “مكان”

المركز المجاور لضريح سعد زغلول هو كمان بيستضيف بشكل دوري فرق كتير بتقدم فنون مصرية قديمة ومحببة للنفوس، أهمها حفل فرقة “مزاهر” لفنون الزار يوم الأربعاء بشكل نصف شهري (أسبوع آه وأسبوع لأ)، وكذلك مغنى المواويل مع جمالات ورضا شيحة يوم الثلاثاء بشكل نصف شهري برضه، وبداية حفلاتهم دايمًا في تمام الثامنة مساءً، تابعوا من هنا.

عروض سينما دال

يوم الأربعاء من كل أسبوع في تمام الساعة السابعة والنصف مساءً، نادي سينما مركز دال للأبحاث في جاردن سيتي بيقدم مختارات من أفضل الأفلام من كل سينمات العالم، والدعوة عامة والحضور مجاني، تابعوا من هنا.

عروض سينما دكّة

في بداية كل شهر بينزل جدول عروض الشهر وفكرته وأهدافه والخيط الرابط بين الأفلام المعروضة على صفحة “دكة أضف”، العروض اللي معادها الأسبوعي الثابت بيكون الثلاثاء في تمام السابعة مساءً في مقر الدكّة في المقطم، والدعوة دايمًا عامة والحضور مجاني، تابعوا من هنا.

فعاليات الجري الجماعي

كل أسبوعين يوم الجمعة 7:00 صباحًا الجرية الكبيرة مع مجموعة كايرو رانرز، والمكان بيتم الإعلان عنه على الصفحة بانتظام وقبل الفعالية بوقت كافي، وكل أسبوع الساعة 7:30 مساء الثلاثاء جرية ثابتة لمجموعة “نايت رانرز” والمكان برضه بيتم تحديده والإعلان عنه بانتظام على صفحة فيسبوك.. تابعوا فعاليات كايرو رانرز من هنا، وفعاليات نايت رارنز من هنا.

و..

وتحيا الشلة وخروجاتها وزعيمها!