The Definitive Guide to Living in the Capital , Cairo , Egypt

فيلم Live By Night بيحمل في طياته عنصريين أساسيين كان عندنا اشتياق كبير لهم.. الأول هو عالم الجريمة المنظمة الوقح والمميز لأمريكا في فترة العشرينيات والثلاثينيات، لما كانت العصابات بتسيطر على كل شيء تقريبًا خاصة مع نهاية فترة الحرب العالمية الأولي، والعامل الثاني هو فكرة الشخصية اللي بتتحول من شخصية سوية ولها مستقبل باهر لشخصية إجرامية بتشق طريقها في عالم من الفساد والدمار الأخلاقي والمالي.

فيلم Live By Night بيحكي عن جو كافلين اللي بنشوفه في المشهد الافتتاحي للفيلم مصاب بشدة وبيبدأ يحكي قصته مع كيفية تحوله من مقاتل عائد من الحرب لرجل عصابات، وقصة صعوده الغريب في عالم الجريمة والمشاكل والعقبات اللي بتواجهه، والصراع الداخلي اللي بيعاني منه نتيجة شخصيته الجيدة والعالم الفاسد اللي بيجبره عند مرحلة ما أنه يتحول لشخص فاسد أيضًا.

فيلم Live By Night من تأليف وإخراج وإنتاج وتأليف بن أفليك! وهو شيء مش عارفين هل أفاد الفيلم أم لا! ونقدر نقول أن كان له جوانب سيئة وجوانب كويسة في نفس الوقت… الجوانب الجيدة كانت متمثلة في أن البطل والمخرج والمؤلف لما يكونوا شخص واحد ده بيؤدي لحالة من الفهم الجيد جدًا للأحداث والنص، ونقدر نقول أن شخصية المؤلف بتساعد المخرج اللي بيساعد البطل… اللي هم في النهاية نفس الشخص!

أما الجانب السيء فبيتمثل في حالة التشتت اللي بنلاحظها في الأحداث والإخراج والتمثيل، وده لأن كل المجهودات دي كانت ملقاه على عاتق رجل واحد فقط، وهو أمر مزعج ومتعب أكيد ومهما كان بن أفليك متميز وشاطر مش هيقدر يجمع بين كل المهام دي بكفاءة.

بعيدًا عن بن أفليك، الأداء التمثيلي كان بيتأرجح مابين متوسط إلى سييء، على الرغم من الشخصيات المرسومة كويس جدًا إلا أن تجسيدها على الشاشة كان ضعيف، وبيشارك أفليك في بطولة الفيلم إيلي فاننج، وزوي سالدانا، وسكوت إيستوود.

بنعيب على الفيلم بعض التطويل في الأحداث، وإحساسنا بالمط خاصة في النصف الأول، أما الربع الأخير من الفيلم تميز بعدد من المشاهد القوية والمطاردات اللي تم تنفيذها ببراعة وخشونة تناسب  عصر العشرينيات والبيئة المحيطة به من أعمال عصابات وقتل وتهديد وخطف، خاصة أن الفيلم بيركز على فترة منع بيع الكحول، وازاي قدرت العصابات تحقق أرباح ضخمة من كسر القانون الخاص بمنع بيع الكحول فى أمريكا.

ديكورات الفيلم كانت رائعة جدًا، ونقلتنا بصريًا لحقبة مانعرفش عنها الكثير، كمان الإضاءة والكادرات المتميزة شاركت الديكور والموسيقى وكونوا مع بعض لوحة فنية جميلة وسيمفونية من الجمال المتكامل، وقدر القائمين على الفيلم يديروها بحبكة وقوة طوال فترة أحداث الفيلم.

لو كنت من محبي أفلام العصابات والمطاردات والأحداث التاريخية.. ماينفعش تفوت مشاهدة Live By Night بحال من الأحوال.

علشان تبقى عارف:

كان المفروض يتم تقديم الفيلم في وقت مبكر عن الوقت الحالي، لكن بن أفليك أجل الفيلم علشان يشارك في فيلم Gone Girl من إخراج ديفيد فينشر.