The Definitive Guide to Living in the Capital , Cairo , Egypt

في الآونة الأخيرة ومع ظهور اهتمام الناس بالرياضة انتشرت شوية رياضات في مصر لذيذة بتؤدي الغرض من أنها بتخليك شخص رشيق من غير ما تحسسك بالمرارة والتمن اللي أنت بتدفعه علشان توصل لهدف الرشاقة ده بسبب أنها مش صعبة قوي في تنفيذها وكمان بتبقى بتتلعب وفي خلفيتها مزيكا حلوة هي اللي بتحركك وبتدفعك أنك تكمّل؛ من الرياضات دي مثلًا رقص الـ zumba بالإضافة إلى رياضات تانية عندها نفس المميزات دي بس محتاجين نسلط الضوء عليها زيادة؛ من ضمن اللعب دي رياضة برازيلية اسمها capoeira. وتسليط الضوء عليها ده اللي إحنا هنعمله في المقال ده، هنعرفك على لعبة جديدة وهنقول لك أصلها وفصلها وكمان ممكن تلعبها فين.

الـ capoeira لعبة قتالية في شكل رقص، طب إزاي يا جدع؟ إحنا هنقول لكم باختصار أصلها تاريخيًا علشان تقدروا تجمعوا التجميعة دي في دماغكم.

اللعبة دي بدأت لما البرتغال كانت محتلة البرازيل وكان المستعمرين بينقلوا لهم عبيد من أفريقيا، العبيد قرروا إنهم لازم يتدربوا علشان يساعدوا ويدافعوا عن نفسهم قدام المسعتمر، وعلشان يعملوا تمويه لتدريبهم ده بدأوا يعملوا كأنهم بيرقصوا على مازيكا لكن في الحقيقة الرقص ده كله عبارة عن حركات قتالية متغطية تحت ستارة المازيكا بس يا سيدي واتحولت إلى رياضة معروفة في دول العالم بعد كده.

اللعبة دي دخلت مصر من سبع سنين فاتوا، حاليًا اسم الفريق بتاعهاcapoeira Brasil لكن أول ما بدأوا في مصر ماكنش ده اسمهم، بدأ الفريق ده يلعب الكابويرا في مصر بأشكال اللعبة المختلفة؛ الشكل الأول اسمه (كابويرا أنجولا) ودي بتبقى حركات قتالية بطيئة هي الأساس اللي اتاخد منها الشكل التاني اللي اسمه (كابويرا ريجونال) وده بيعتمد على الحركات السريعة وبيغلب عليه طابع الاستعراض والأتنين لما ييجي وقت الـgame بيقفوا على شكل دايرة اسمها (رودا) ويبدأ كل اللي واقفين في الدايرة يسقفوا ويغنوا ويعزفوا على آلات معينة علشان يدوا طاقة للأتنين اللي في النص اللي بيلعبوا.

أما بالنسبة للتدرج في اللعبة فاللعيب بياخد الحزام الأخضر بعد مرور أول 6 شهور من لعبه وبعد كل تلات شهور بيتضاف له حزام جديد؛ يعني ياخد فوق الأخضر حزام أصفر ثم عليهم ياخد الحزام الأزرق لغاية ما يجمع علم البرازيل كله فيبقى بده وصل لمرحلة أنه ممكن يدرّب.

بيقام للفريق بطولة سنوية بتستمر3 أيام بييجي لها حكام من البرازيل مش بس علشان يحكموا في البطولة بل وكمان بيبدأوا يعملوا ورش تعليم للّعيبة يعلموهم فيها حركات جديدة، بس يا سيدي والتحكيم في البطولة دي بيكون على أساس أد إيه أنت شغوف باللعبة دي.

الكابويرا مركزها ومحورها الترويح عن النفس والطاقة الإيجابية اللي تملاك بسبب المزيكا والأغاني اللي بتتسمع أثناء اللعب اللي مليانة حكمة وفلسفة بالإضافة طبعًا للجسم الرياضي الرشيق اللي بتديهولك اللعبة طول ما أنت شغوف بها.

طيب بعد ما عرفنا كل حاجة عن اللعبة نلعبها فين؟ فريق كابويرا برازيل بيلعب في نادي السلاح اللي في العتبة اللي بيكون على يمينك أول ما تنزل من على كوبري الأزهر والتمرين بيكون يوم الأحد والتلات والخميس وأول مرة بتبقى for free وتقدر تتواصل معاهم على صفحتهم على الفيسبوك  هنا علشان تعرف تفاصيل أكتر عن الانضمام لهم.