The Definitive Guide to Living in the Capital , Cairo , Egypt

اليومين دول كل الكلام بيكون على الموضات الجديدة زي الآيس كريم رول والميلك شيك المطرقعة والدونات آيس كريم، وكل مكان بيحاول يعمل تقليعة جديدة يتميز بيها، لكن جيلاتي عزة يعتبر من الأماكن القليلة اللي محافظة على الآيس كريم اللي كلنا عرفناه وحبيناه من صغرنا.

جيلاتي عزة فاتح في ميدان لبنان المهندسين من غير أي مكان للقعدة، وبالتالي لازم تطلب الآيس كريم بتاعك وتشق طريقك. الغريب في الموضوع إن جيلاتي عزة ماعندهمش أي ثلاجة لعرض النكهات زي ما بنشوف في أي محل آيس كريم، فبتقدر تطلب نكهتك من الصور المتعلقة على الحيطة. حاجة ثانية مضحكة إن مافيش فاصل بين نكهات الآيس كريم المختلفة وكلهم داخلين على بعض.

المهم إننا طلبنا كوباية جيلاتي ليمون ومانجو(8جنيه). نبدأ بالليمون اللي قوامه ممتاز ومطاطي شوية وطعمه لاذع قوي. أما المانجو فطعمها المسكر اللذيذ كان تحفة، وتحس كأنك بتأكل مانجو بجد. بصراحة بولة المانجو كانت من أحلى بولات الآيس كريم اللي جربناها من فترة طويلة.

جربنا كمان بولة جيلاتي كريمة (8 جنيه). في الأول بصراحة كنا متوقعين إنها تكون مجرد بولة آيس كريم فانيليا تقليدية، بس طلعت حاجة أحلى بمراحل. ممكن تقول إن طعم الجيلاتي كريمة قريب جدًا من طعم المهلبية المستوية في الفرن وكانت أخف ومش مطاطية زي البولات اللي فاتت.

جايز الموضوع كان محتاج شوية رتوش، بس الأكيد إن جيلاتي عزة فكرنا بمحلات زمان اللي كلنا بنحبها. جودة الآيس كريم عند عزة نفس اللي بتشوفها في معظم محلات آيس كريم القاهرة وحجم البولة يعتبر رهيب بالمقارنة مع سعرها. صحيح تشكيلة النكهات عندهم قليلة، لكنها شاملة أهم الأصناف وعلشان كده ما ينفعش تحكم على الجيلاتي من الثلاجة؛ الطعم هو الفيصل.