The Definitive Guide to Living in the Capital , Cairo , Egypt

كتير مننا بيتحطوا في موقف أنهم تايهين والبطارية فصلت ومافيش جوجل مابس – Google maps، ومافيش مفر من سؤال حد من الشارع، نحب نقولك احترس احترس احترس، أنت على وشك أنك تصاب بصدمة عصبية شديدة من الناس وبالذات الناس دول:

الشخص البرنس بتاع هو قال لك فين؟!

ده كائن جميل ربنا بيبعتهولنا يعلمنا به الصبر، يعني حضرتك طب ما أنا لو أعرف هروح على طول ومش هسألك أصلًا، الشخص ده حالة عامة مش شخصية منفردة بذاتها وبتتكرر مع  كل سؤال من حد ما تعرفوش، هو قال لك فين، طب ما أنا لو عارف هسألك ليه يا عم!! 

اللي واخد حقنة فول على الصبح ومش داري باللي حواليه وتحس في وشه أنه مش طايقك

بعد إذنك عاوز أروح الأوبرا

الأوبراااااا .. اللي فين دي!!!

شكرًا جدًا يا حاج فكرنا بأحمد السقا وهو بيقول لهنيدي :" الأوبرا إحساس يا خلف وأنا جعان…"

الحبيبة وهم مش مركزين معاك أصلًا

الحقيقة دي قلة ذوق، يا جماعة اتنين عاوزين اثنين ليمون تقطع عليهم الجو وتسألهم عن شارع يحي حقي مثلًا ما هو أكيد هيتوهك يعني!!

الأطفال  هم همهم هتعدي امتى علشان يكملوا ماتش الكورة

كده أنت بتمضي  شيك على بياض أنهم يتوهوك اه والله زي مابقول لك كده، حنكوره وحماده بلية متراهنين على  اثنين حاجة ساقعة، اللي هيكسب هو اللي هيدفع، والدنيا حر وحانكورا هيجب الجون التاني وهوبااااا طلعت أوت..

لو سمحت اطلع على المعادي منين#@$%#%$^ أنت جيت في وقت غلط خالص حضرتك.

أمين الشرطة 

الحق يقال فيه منهم ناس بتفهم، وممكن تدلك على الطريق صح، لكن الأغلب بيتحولوا فجأة لكائن هو قال لك فين…!!! مش بس كده ده ممكن مايردش وتحس انه غريب مش من هنا، هم قالوا له أقف هنا فوقف هنا ويمكن هو مش عارف هو فين أصلًا. وفيه منهم الفتاي اللي حافظ جملة واحدة خش شمال في يمين يا باشا!

الباعة المتجولين خصوصًابتاع البطاطا والترمس

 تقريبًا ممكن يلففك الميدان 3 مرات يمكن تزهق من المشوار وتشتري منه ، ونلف في دواير ودواير تلف بينا وندووووووور.

هاه قولت لي عاوز تروح فين؟ طب هو قال لك فين؟!