The Definitive Guide to Living in the Capital , Cairo , Egypt

ما كناش عايزين نبدأ المقال بكلام عن "صعوبة الحياة في المدينة في عصر ما بعد الحداثة" -الكلام الكبير ده هزار على فكرة- وقد إيه رتم الحياة السريع في الزمن ده مش مخلينا عارفين نرتاح. بالرغم من أن الكلام ده كليشيه وسمعناه كثير، إلا أنه للأسف واقع، وواقع عالمي كمان.

صحيح إحنا بنحب القاهرة، إلا أن الواحد برضه يقول اللي ليها واللي عليها؛ القاهرة بزحمتها وحرها ودوّشتها بتخلي الواحد دماغه تلف… ضيف على كده بقى ضغوط الشغل والحياة اليومية والمسؤوليات، نكدنا عليك؟ تمام، إحنا شخصيًا بنعاني من كل ده وما فيش وقت يسمح إننا نسافر برة القاهرة علشان "نطفي مَكَن"، فقررنا أننا نروح حصة يوجا من باب التجربة… أهو… يمكن الموود يتعدل شوية، وبالمرة قررنا نحكي لكم عن التجربة دي، واللي قمنا بيها في مودرا يوجا ستوديو – Mudra Yoga Studio  في الزمالك.

للي يعرف فين كافيه صوفي في الزمالك، مودرا موجود في نفس العمارة اللي فيها صوفي في الدور اللي فوقيه على طول في الشقة اللي في الوسط. أول ما بتدخل بتقلع الجزمة على الباب –ودي كانت حاجة موترة للأعصاب جدًا بالنسبة لنا، مع أننا بنغسل رجلينا والله- فاعمل حسابك كده وأنت رايح علشان ما تتفاجئش، وممكن طبعًا تفضل بالشراب، المهم تمشي حافي وخلاص.

المدربين في مودرا لطاف جدًا وودودين، وهيحسسوك أنك في بيتك فما تقلقش، قبل ما تدخل الحصة هيسألوك لو عندك أي مشاكل صحية أو بتحس بوجع في أي مكان في جسمك. إحنا كنا داخلين حصة واحدة من غير اشتراك عضوية فدفعنا 100 جنيه –سعر الحصة- إنما أنت  لو عايز اشتراك، ففيه عضوية لعدد 8 حصص سعرهم 650 جنيه، أو 12 حصة بـ 800 جنيه.

طبعًا إحنا دي من المرات المعدودات في حياتنا اللي نلعب فيها يوجا، وده اللي وضحناه لمدربنا "ناصر"، واللي بدأ معنا الحصة بمجموعة من الإحماءات الخفيفة، وطلب مننا أن ما نضغطش على نفسنا بدنيًا تحت أي ظرف من الظروف، وده كان شيء مريح.

بعد مجموعة من حركات اليوجا البسيطة جدًا –والمتعبة جدًا لحد لياقته البدنية على قده زيّنا- كان فيه فترة تأمل وإحنا في وضع (السافاسانا) وهو يشبه وضع الجثة (بالبلدي نايم على الأرض على ضهرك)، المدرب طلب مننا أننا نغمض عنينا وغماها بكيس فيه نبات اللافندر وهدأ الأنوار، وفضلنا كده حبة حلوين. بالرغم من أن الوضع اللي إحنا كنا عليه يبان سهل وبسيط، إلا أن فكرة تصفية الذهن من كل حاجة من أصعب الحاجات اللي قابلناها في التجربة. واللي نعرفه أن التأمل هو كمان زي الرياضة محتاج تمرين، فممكن جدًا أنك تواجه صعوبة فيه زي حالتنا. بعد ما خلصنا نظفنا الـ Mat  (السجادة اللي بنلعب عليها يوجا) بنفسنا ورجعناها مكانها، غيّرنا هدومنا في الحمام الموجود في المكان واسترخينا لفترة في القاعة الخارجية علشان نتأهل للخروج للعالم الخارجي مرة ثانية.

صحيح التجربة كانت غريبة علينا ولكن كانت حلوة جدًا، جلسة التأمل بالنسبة لنا كان تعذيب لأن مخّنا مش واخد عليه ولكن اليوجا كرياضة جرت الدم في عروقنا وغيرت موودنا تمامًا. عن نفسنا إحنا ناويين نرجع ثاني لمودرا.