The Definitive Guide to Living in the Capital , Cairo , Egypt

كل أسبوع بنحاول نوفر لكم أكبر قدر من الأحداث اللي تساعدكم تقضوا وقت لطيف في الويك إند، وتقدروا تشوفوا أحداث أكثر من أجندتنا.

نبدأ بالنهارده الخميس، وعلى مسرح الجمهورية  هتلاقوا مسرحية "أنا هاملت" واللي حصلت على جائزة أفضل ممثل في مهرجان القاهرة للمسرح التجريبي لعام 2009، العرض من إخراج هاني عفيفي. ولعشاق الباليه فرقة باليه أوبرا القاهرة بمصاحبة فرقة أوركسترا القاهرة السيمفوني هتقدم  باليه "روميو وجولييت". العرض من تأليف الموسيقار بروكوفييف، ومن إخراج عبد المنعم كامل والقيادة الموسيقية للمايسترو نادر عباسي، وأسعار التذاكر  100 – 75 – 50 جنيه، والحضور بالملابس الرسمية.

وعلى مسرح دار أوبرا جامعة مصر للعلوم والتكنولوجيا فيه حفل موسيقي للفنان علي الحجار، وأسعار التذاكر: 75 – 100 – 150 – 200 – 225 – 250 جنيه. أما لمحبي الموسيقى المختلفة فعلى مسرح الضمة  فيه حفل لفرقة "نوبانور" واللي هتقدم مجموعة من الأغاني الشعبية النوبية، وسعر التذكرة عند الباب 30 جنيه.

وننتقل ليوم الجمعة، ومفاجأة لكل محبي الماريمبا في قاعة الحكمة بساقية الصاوي هتلاقوا حفل خيري للفنانة نسمة عبد العزيز عازفة الماريمبا، والحفل من تقديم جمعية الأرض الخضراء. كمان في علبة ألوان فيه حفل موسيقي للمشروع الموسيقي السكندري سرور وشريف غالي. والثنائي  هيقدموا مجموعة من الأغاني المعاصرة، على الإيقاع والجيتار والكيبورد، وسعر التذكرة 30 جنيه.

أما لو نفسك تجرب أكل مختلف من أكثر من مطعم يبقى ما تفوتش مهرجان المأكولات الشهير "كايرو بايتس" في حديقة الميريلاند ، واللي بيضم أشهر الأسماء في عالم الأكل، كمان هيبقى فيه فعاليات موسيقية وفقرات غنائية، تحت شعار الحنين للماضي، وسعر التذكرة 75 جنيه لليوم الواحد، شاملة الفقرات الغنائية والمسابقات وقسائم شرائية تستخدم بعد المهرجان. ونحب نفكركم أن معرض "زهور الربيع" في حديقة الأورمان لسه مستمر لأخر الشهر، وعامل تخفيضات حاليًا على كل أنواع الزهور للي يحب يشتري.

ونختم بيوم السبت، بما أننا داخلين على شم النسيم والصيف.. هتبدأ الاحتفالات بأعياد الربيع، في مركز الطفل بقطامية هايتس وده يوم مناسب لجميع أفراد الأسرة. كمان على مسرح الهناجر بدار الأوبرا المصرية فيه عرض مسرحي بعنوان "الخلطة السحرية للسعادة"، وهي مسرحية تجريبية من فصل واحد، والعرض كتابة وإخراج شادي الدالي.

 ولمحبي التجديد روحوا شارع الألفي والشواربي في وسط البلد  فيه مجموعة عروض "روح المدينة"، واللي تستهدف المارين بالشوارع كجمهور للعروض اللي ضمن فعاليات مهرجان D-CAF بوسط البلد وهي:"جسد لجسد" من هولندا ومصر، وعرض فرقة "الكوشة" للعرائس من مصر،و"نظرة" من المملكة المتحدة ومصر. كمان على المسرح الكبير بدار الأوبرا المصرية فيه حفل موسيقي لأوركسترا القاهرة السيمفوني، مع السوليست عبادة أحمد وتحت قيادة أموري دو كلوسل واللي هيقدموا مجموعة من الأعمال الشهيرة، وأسعار التذاكر 50 – 35 – 25 جنيه، وللطلبة 35 – 25 – 15 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر تابعوا أجندتنا.