The Definitive Guide to Living in the Capital , Cairo , Egypt

الكتاب ده له معانا قصة كوميدية! في البداية عرفنا الكاتب كيرلس بهجت من على الفيسبوك، كيرلس دكتور بيحب يكتب في علم النفس والفن وعنده جمهور كبير من المتابعين وبالتالي وصلت لنا بوستاته، ولما تابعناه عرفنا أنه نشر أول كتاب له وقررنا نشتريه، الموقف الكوميدي لما روحنا نشتري الكتاب وطلبنا من البائع أنه يطلّعه لنا، حالة من الضحك انتابت الناس اللي واقفة في المكتبة علينا وإحنا بنسال عن كتاب اسمه فيه كلمة "روح أمه"!

مُتوقَع طبعًا أن الكاتب يتعمد أن الاسم يكون جرئ وصادم، لو ما حدش قرأ حاجة للكاتب قبل كده وعارف هو رايح يشتري إيه عمره ما هيعرف يصنف الكتاب صح لو شافه على الرف في المكتبة.

اسم الكتاب وغلافه بعيد تمامًا عن أنه يعطيك انطباع مضبوط عن محتواه، الكتاب باختصار -من خلال سرد بعض المواقف اللي بتحصل معانا كل يوم- بيشرح نظريات مهمة جدًا في علم النفس مدعومة بالأدلة والمصادر بطريقة سلسة جدًا وبأسلوب ساخر وبالعامية في 240 صفحة من القطع المتوسط، من أفضل الكتب اللي قرأناها مؤخرًا في المجال ده (مجال علم النفس أو التنمية البشرية لو حابب تقول كده) الفكرة أنه كيرلس مختار حاجات وتصرفات بنعملها كل يوم بس عمرنا ما فكرنا إحنا ليه بنعملها وإيه الدافع النفسي اللي ورا ده.

على سبيل المثال: ليه مامة صاحبك بتفضل تلمّع البيت كل شوية طول ما أنت عندهم؟ ليه الممثل الكوميدي ممكن يكون مكتئب؟ ليه فيه ناس بتنشر صورها بشكل مبالغ فيه على السوشيال ميديا؟ ليه الناس بتفضل مقتنعة بالحاجة الغلط حتى لو عرفوا الصح؟.. وهكذا موضوعات ومواقف عادية جدًا عمرنا ما فكرنا نحللها.

ولأن الكاتب دكتور فده طبعًا فرق جدًا في مصادره وفرق في الطريقة اللي بيتناول بها الموضوعات.. مش هتلاقي أي حاجة على غرار: "7 طرق للوصول لقلب شريكة حياتك"، وإنما هتلاقي كلام مبني على أبحاث علمية ودراسات مكتوب اسمها وتاريخها وعلى مقالات منشورة في مواقع كبيرة ومكتوب عنوان المقال وبالتالي ده بيعطي مصداقية للمعلومات المطروحة ووجهة نظر الكاتب في المواقف دي.

في النهاية حابين نقول أن الكتاب ده كان ممكن يبقى إخراجه مبهر أكتر من كده وبالتأكيد فيه مشكلة في التدقيق اللغوي، لكنه يظل في النهاية واحد من أحسن الكتب الخفيفة اللي ممكن تساعد الناس تفهم بعض وتتواصل بشكل أفضل.

ننصحكم تشتروه.