دليل أحداث نهاية الأسبوع: حفل الحضرة وعلى الهلباوي وعائشة ماكيبا وكرنفال الزمالك
Cairo 360
كعادتنا في نهاية كل أسبوع بنحاول نوفر لكم أحداث مختلفة هتخليكم تقضوا ويك إند مفيد وسعيد ومختلف عن اللي قبله، ممكن ناس تحب تجرب تشوف ثقافات مختلفة في المسرح أو الباليه أو المعارض الفنية، كل واحد وذوقه، بس الأكيد أنكم ما تضيعوش أجازتكم بدون استفادة.
نبدأ بيوم الخميس وفرقة "فرسان الشرق" هتقدم عرض مسرحي راقص بعنوان "الوالي" على المسرح الكبير بدار الأوبرا المصرية، واللي هيبين فترة تأسيس مصر الحديثة على أيد محمد علي، العرض من تصميم وإخراج طارق حسن، والتذاكر متاحة بشباك الحجز. ولمحبي الفلكلور البورسعيدي فيه على مسرح الضمة حفل لفرقة الطنبورة بمسرح الضمة وسعر التذكرة 30 جنيه.
أما لعشاق الست، فساقية الصاوي عاملة على مسرح قاعة الحكمة حفلتين لعرض "أم كلثوم تعود من جديد" واللي هيقدمه مسرح الساقية للعرائس على أنغام أغنيتي "فكروني – أقول لك إيه"، وسعر التذكرة 15 جنيه لغير الأعضاء، ولأعضاء الساقية 10 جنيه. أما في حديقة ساقية الصاوي برضه فيه حفل توقيع ديوان "سجدة سهو" للشاعر مصطفى حسان، والدعوة عامة.
وننتقل ليوم الجمعة، اليوم ده الزمالك عاملة قلق بحدثين، أول واحد Zamalek Selfie Hunt ودي مسابقة في شوارع الزمالك، كل المطلوب منك أنك تكون فريق من 3: 5 أفراد لخوض تجربة ممتعة في حل مجموعة ألغاز هتوصلك لخط النهاية، وسعر التذكرة للفرد 150 جنيه، وثاني حدث هيكون على مدار يومين في حديقة الأسماك بالزمالك وهو كرنفال ترفيهي بعنوان "كرنفال الزمالك" واللي هيضم كثير من الأنشطة والألعاب المناسبة لجميع أفراد العائلة، وهيضم بازار وساحة للمأكولات كمان.
كمان هتلاقوا في ساقية الصاوي حفل للفنان علي الهلباوي بقاعة النهر وسعر التذكرة 40 جنيه لغير الأعضاء و35 جنيه للأعضاء بالساقية، أما لو نفسكم تقضوا ليلة صوفية هتلاقوا في الربع حفل إنشاد ديني لفرقة "الحضرة"، وسعر التذكرة 30 جنيه.
ونختم بيوم السبت وعرض جديد على المسرح الصغير بدار الأوبرا المصرية هيعمل بث حي من دار أوبرا المتروبوليتان لرائعة بوتشيني "Manon Lescaut". وسعر التذكرة 100 جنيه، وبرضه في دار الأوبرا المصرية بس على المسرح الكبير فيه حفل لأوركسترا القاهرة السيمفوني واللي هتقدم مجموعة من أعمال الموسيقار شومان، والتذاكر متاحة بشباك الحجز.
كمان في علبة ألوان حفل موسيقي للفنانة عائشة ماكيبا مع فرقتها وسعر التذكرة 35 جنيه، ونختم كالعادة بحفل التنورة في مركز إبداع وكالة الغوري، وسعر التذكرة 5 جنيه.
لو عاوزين تعرفوا أكثر عن أحداثنا اللي بننشرها كل يوم على مدار الشهر تابعوا أجندتنا.
ويك إند سعيد!
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
