The Definitive Guide to Living in the Capital , Cairo , Egypt

بـ نفرح أوى لما تشدنا صور مكان على الفيسبوك ويكون عندنا آمال عالية عليه ونروح وما يخيبش أملنا، أو نلاقى الأكل مقدم شكله زي اللى فى الصور بالضبط بدون فوتوشوب أو تزييف، وده اللى حصل بالفعل لما رحنا وجربنا أطباق ميلت بايتس ديلى – Melt Bites Deli فى ويست تاون هب فى الشيخ زايد.

على صفحتهم على الفيسبوك هـ تلاقى صور للأطباق اللى بـ يقدموها وكمان صور لكورسات الطبخ اللى بـ يعملوها للأطفال علشان ياكلوا أطباق من صنع أيديهم، سعر كورس الطبخ 200 جنيه وبـ يكون يوم السبت وممكن تتصل بهم تحجز أو تعرف تفاصيل زيادة، ولسه ما فتحوش الباب لكورسات الكبار.

المكان يفتح نفس أى حد نفسه مسدودة، الديكور أبيض وهادى وبـ يطل على ساحة العربيات (مش موجود فى الجزء الداخلى من ويست تاون هب) وبـ يحيط بالسور بتاعه كله ورود وأزهار ألوانها مختلفة هـ تحسسك بفصل الربيع، الجرسونات هناك فى قمة الذوق ودمهم خفيف جدًا ومتعاونين وهدفهم أنك تمشي من عندهم مبسوط، ده غير أن الشيف بعد ما خلصنا تجربتنا خرج لنا يسأل بنفسه عن رأينا، حتى قال لنا على وصفة أحد الأطباق اللى هـ نقول لكم عليها دلوقت.

المنيو فيها قسم للفطار، والشوربة والأطباق الرئيسية.. إلخ زي أى منيو، بس الجديد فى "ميلت" أنهم بـ يبيعوا مربى وبنكهات جديدة علينا (زي برطمان مربى البطيخ بالليمون 500 جرام بـ 25 جنيه) وجيلى بنكهات مختلفة ومخلل، ده غير أن عندهم أنواع أجبان وسوسيس وتركي وسلامون للبيع بالكيلو، وكل ده هـ تلاقيه أول ما تدخل المطعم فى أرفف أو فى ثلاجات العرض.

لأول مرة فى تاريخ كتابتنا للمقالات النقدية نختار أطباقنا مش من المنيو، اختارناها بناء على الصور اللى شوفناها على صفحتهم، أول حاجة كانت شوربة طماطم مع الريحان (35 جنيه) وRucola Salad (45 جنيه) ودي مكونة من طماطم وجبنة مجدولة وزيتون أخضر بـ Dressing الرمان، وأكثر طبق شدنا على الإطلاق بيف فيليه (140 جنيه) اللى بـ يقدم معاه بيبي بطاطس وجزر مكرمل واختارنا الصوص اللى معاه صوص فلفل، هما بـ يعملوا تسوية الطبق ده Mid-Well لكن إحنا طلبناها Well-Done، وأخيرًا طلبنا طبقPan Seared Chicken بـ (85 جنيه) وهى فراخ متبلة بالأعشاب وبودنج البصل مع بروكلى باللوز المحمص.

أول حاجة نزلت لنا كانت سلة فيها عيش أنواع مختلفة وطبق صغير فيه زيت زيتون مع دبس الرمان، ولوح خشب عليه مربعات زبدة صغيرة، العيش كان فريش وأول مرة نجرب تغميس زيت الزيتون مع دبس الرمان بس كان طعمه حلو، وبعدها جات لنا الشوربة، حجمها كان كبير أوى ومزينة بالكريمة مع زيت الزيتون من الوش ومعاها توست محمص بالزبدة، الشوربة كانت خفيفة مش زي أماكن ثانية بـ تعملها ثقيلة أوى لدرجة تشبعك وما تعرفش تكمل أكل وقوامها كمان كان كويس وطعم الريحان واضح فيها.

ندخل بقى على الكلام الكبير وهو البيف، البيف كان مستوي حلو أوى لدرجة أنه كان طري فى فمنا والتتبيلة بتاعته والصوص كانوا أكثر من رائعين، صوص الفلفل ما كانش مر زي العادة، ده أحلى صوص فلفل ذوقناه لحد دلوقت، للأسف ما جاش لنا بيبي بطاطس لأنه ما كانش الموسم بتاعها وجاءت بدلها بطاطس مكعبات بس كانت حلوة، والجزر كان محتاج يستوى شوية زيادة لأنه كان مقرمش.

آخر طبق الفراخ ببودنج البصل والبروكلى مع اللوز المحمص كان اختراع برضه، الفراخ كانت بتتقطع لوحدها من كثر ما هى طرية وتتبيلتها مضبوطة، طلبنا عليها صوص الليمون اللى أضاف لطعمها كثير، واللى بقى كان اكتشاف بالنسبة لنا بودنج البصل، ومن كثر ما هو عجبنا سألنا الشيف عليه وقال لنا وصفته وسر المهنة، وفكرة المزج بين طراوة البروكلى وقرمشة اللوز المحمص كانت فى الجون، كان ثنائى ناجح جدًا.

ختمنا زيارتنا بحاجة أول مرة نشوف مطعم بـ يعملها وهى Cake in a Mug، الوصفة دي مشهورة جدًا فى البيوت وبـ نعملها فى مج وتتحط فى الميكروويف بمكونات بسيطة علشان نكسب وقت وناكل حاجة حلوة نفسنا فيها، قررنا نجربCherry Brownie Chocolate Cake بـ (25 جنيه) وبـ ينزل معاها بولة آيس كريم فانيليا وبـ تتقدم فى المج زي ما هى، العجينة كانت غنية جدًا ومزج الشيرى مع الشوكولاتة كان ناجح، والوصفة دي ما تنفعش من غير الآيس كريم لأنه بـ يكسر دسم الشوكولاتة كثير.. لازم تجربوها.

تجربتنا فى "ميلت بايتس ديلى" كانت أكثر من رائعة، الأطباق اللى جربناها أكيد معمولة بحب واهتمام بالتفاصيل علشان طلعت بالحلاوة دي، لو عندك مناسبة أو حابب تعزم نصك الثانى فى مكان مميز وخدمة وأكل ممتازين مش محتاج تحتار كثير.