The Definitive Guide to Living in the Capital , Cairo , Egypt

رغم أن المندي في الأساس أكلة جاية من حضرموت في اليمن، إلا أن "خيم المندي" في كرداسة مش بـ يوعد زواره أنه هـ يقدم لهم أكل يمني، هو بـ يقول أنه هـ يقدم مندي ومشويات، وهو ده الوعد اللي بـ يوفي به على أكمل وجه، لما سمعنا عنه كنا محتارين بينه وبين مطعم ثاني مشهور في كرداسة اسمه "عبلة"، لكن شكل القعدة في "خيم المندي" خلانا نحسم القرار خصوصًا أن كان معانا أطفال صغيرين محتاجين ياخدوا راحتهم.

دخلنا المكان وفعلًا كان الموضوع مريح جدًا، والاختيارات كثير بداية من القعدة اللي الزائر ممكن يختار بين ثلاث أنواع فيها، النوع الأول قعدة عربي على الأرض، والنوع الثاني قعدة عادية على ترابيزة وكرسي، والنوع الوسط وده اللي اختارناه عبارة عن ركنة وترابيزة، المكان ككل واسع ويساع عدد كبير من الزوار، والمنيو متنوع جدًا.

يمكن الملاحظة الوحيدة هي أن الركنة قماشها مش  جديد، متهالك جدًا، لكن المكان والجو الحلو خلونا ما نركزش، لأن المكان بـ يراهن على الراحة ودي اتحققت بشكل كبير، بدأنا نطلب الأكل، طلبنا وجبة لحم ماعز مع الأرز والسلاطة (55 جنيه)، لكن قالوا لنا أنها هـ تجهز بعد ساعة إلا ربع لذلك اختارنا حاجة ثانية وهى نصف بطة محشية أرز بالخلطة (45 جنيه)، اختارناها بعد توصية من أصدقاء لنا قالوا أن البط هناك أكثر من رائع، لكن لما جاءت ما عجبناش شكلها وحسينا أنها بايتة، طلبنا الشيف أكد لنا أنها مش بايتة، وفي نفس الوقت اعتذر أن شكلها ما عجبناش وقال لنا اطلبوا اللي أنتم عاوزينه، وفعلاً طلبنا فردين سمان مشوي، وطبق مزاليكا، وطبق محاشي، وطرب، وهنا حصل السحر.

الطلبات جاءت في وقت قياسي تقريبًا 10 دقايق وده لأنهم فعلًا بـ يتشغلوا في كميات ضخمة شغل متواصل، بعضنا ما كانش ذاق السمان قبل كده وكان رافض يذوقه لكن بمجرد ما جه ريحته وشكله خلوهم ينبهروا بالطعم الرائع والشوي المميز، فرد السمان (20 جنيه)، المحشي ما كانش ممتاز لكن ما كانش سيء، لكن أكثر حاجة أبهرتنا فعلاً طبق المزاليكا (20 جنيه) ويكفي أكثر من فرد (حوالي 3)، غرقانة في الصوص وصابحة وطعمها ممتاز جدًا، أما بقى الطرب فحدث ولا حرج عن الجمال والطعامة، ما أفضل المرات اللي تذوقنا فيها الطرب على أصوله، لحم نظيف وصافي تمامًا، وشوي تمام، السلاطات كانت كثير وكذلك المقبلات، والعيش مخبوز على أيديهم، كيلو الطرب (120 جنيه)، كمان طلبنا طبق بطاطس محمرة (5 جنيه).

مفاجأة المكان الحقيقية هي الشاي، مش ممكن تزور خيم المندي وما تشربش الشاي الأخضر الغريب بتاعهم، بـ ييجي فى البراد، وبـ يكفي 3 أشخاص تقريبًا، الشاي مليان رغاوي كثير جدًا، وطعمه وهمي، فيه حاجة غريبة جدًا ما قدرناش نحددها لكن الأكيد أن مفعولها أقوى من النسكافيه والشاي الثقيل مجتمعين، رغم أن مشهد الشاي يبدو خفيف جدًا، لكن طعمه اللي فيه خليط من النكهات واللي أصحاب المكان بـ يأكدوا أنهم بـ يزرعوه بنفسهم، خلانا نصبر نفسنا أننا أكيد هـ نزور المكان ثاني، طلبنا برادين شاي كاملين، وطلبنا أكل يكفي ثلاث أفراد ودفعنا في النهاية 120 جنيه! كلنا قومنا شبعانين.

المنيو كان مليان اختيارات ثانية حمستنا للزيارة الجاية، عندهم ركن الرومي المندي، ورك رومي مع أرز وسلاطات (150 جنيه)، وفيه دبوس رومي مع أرز وسلاطات (60 جنيه) وممكن وجبة رومي تكفي فرد واحد بـ 45 جنيه، وفيه ركن ثاني للمندي بس وده فيه لحم ماعز بحد أدنى ربع جدي بالحجز، وممكن بقى وجبة لحم الماعز اللي قولناها في الأول ودي فيه ناس بـ تيجي تطلبها وتستنى بالساعة إلا ربع علشان خاطرها، روحنا بنفسنا المطبخ واتفرجنا، هم فاتحين المطبخ على البحري وممكن أي حد معدي يغسل أيده يتفرج على الدنيا من بره.

ركن المشويات المهيب عندهم لازم نقف عنده شوية، كيلو الكباب البتلو بـ 160 جنيه، وكيلو الريش (150 جنيه)، أما كيلو الكفتة الضاني (80 جنيه)، ممكن تطلبوا طبق مشويات ميكس فيه كل حاجة بـ 75 جنيه.

المشروبات عندهم برضه مميزة، الفاكهة الفريش (10 جنيه) ماعدا مندي الكوكتيل (12 جنيه) والزبادى والموز باللبن (8 جنيه)، كمان عندهم آيس كريم الناس بـ تيجي له مخصوص طلبناه لكن ما عجبناش، وطلبنا منهم يبلغوا الإدارة أن مستواه بقى أقل عن آخر مرة (البولة 5 جنيه)، كمان عندهم أرز باللبن ومهلبية وأم علي وكسترد بالمكسرات (الطبق 10 جنيه) شوفنا ناس بـ تاكلهم باستمتاع شديد وقررنا نجربهم المرة الجاية.