The Definitive Guide to Living in the Capital , Cairo , Egypt

حياة كل واحد فينا تجربة فريدة بكل المقاييس، كل واحد فينا بـ يعيش قصة مختلفة من الكفاح والمعافرة وساعات الاستسلام، لكن وسط كل ده بـ نحتاج لخروجة تخلينا نفصل عن كل اللي حولنا، علشان نرجع ثاني بقوة نكمل في طريق حياتنا، والويك إند بتاع الأسبوع ده مليان أحداث.

نبدأ بيوم الخميس، هـ تلاقوا في الحرم اليوناني بوسط البلد مهرجان القاهرة الدولي لموسيقى الشعوب -ونس 2- واللي هـ يضم كثير من الفرق الفولكلورية العالمية، وهـ يضم في اليوم الأول فرقة "الجركن" البدوية من مصر، وفرقة "بهانجرا" من الهند، وفرقة "الطنبورة" من مصر، وبرضه في الحرم اليوناني فيه عرض لمسرحية "سبعة"، واللي هـ يضم حكايات لسبع نساء ما قبلوش يسكتوا أو يستسلموا، والمسرحية هـ تضم الفنان خالد أبو النجا والفنانة منة شلبي، أما الإخراج فهو لحسن الجرتلي.

أما في ساقية الصاوي فيه حفل غنائي لفرقة "المزيكاتي" مع خالد مصطفى في قاعة الحكمة، وسعر التذكرة 35 جنيه للأعضاء و40 جنيه لغير الأعضاء بالساقية. أما لو عاوزين تبدأوا الويك إند بنشاط لازم تجربوا حلقة رقص زومبا للسيدات فقط بقاعة النهر بساقية الصاوي برضه، وسعر التذكرة 100 جنيه. كمان فيه في علبة ألوان حفل موسيقي لفرقة "تابو"، وسعر التذكرة 30 جنيه.

وننتقل ليوم الجمعة، ومفاجأة مع حفلات فرقة كايروكي لأنهم عاملين 4 حفلات على مدار يومين (الجمعة والسبت)، وهـ يبقى في قاعة النهر بساقية الصاوي أربع حفلات، على مدار حفلتين في اليوم الواحد، وسعر التذكرة 50 جنيه. أما في دار الأوبرا المصرية على المسرح الصغير حفل للفنان يحيي خليل بمصاحبة فرقته، وسعر التذكرة 50 جنيه.

ومهرجان ونس 2 في الحرم اليوناني بـ يكمل معانا لليوم الثاني مع حفلات لفرق مختلفة زي حفل فرقة "الرانجو"، "سكاكا" و"بينونة الحماسية"، والحجز من خلال الشركة المختصة، كمان فيه في ساقية الصاوي مهرجان الشوكولاتة السنوي، واللي هـ يضم العديد من العروض المسرحية والفنية. كما يضم سوق للشوكولاتة، وسعر التذكرة 25 جنيه لغير الأعضاء بالساقية و20 جنيه للأعضاء. وكعادتنا كل يوم جمعة، وعرض الأراجوز وخيال الظل في مركز إبداع بيت السحيمي، والدعوة عامة.

ونختم بيوم السبت، ونكمل لليوم الثالث مع مهرجان ونس 2 في الحرم اليوناني واللي هـ يقدم النهارده حفل فرقة "سينت"، "نوبانور" وعازف الهارب شيان جيمس، والحجز مع الشركة المختصة. كمان لو عاوزين تحضروا حاجة مبدعة ومفيدة TEDx Youth في درب 1718 هـ يقدم العديد من المناقشات والندوات اللي هـ تضم كثير من مبدعي مصر، واللي بعنوان "يوريكا" (وجدتها).

أما لمحبي الموسيقى الهادئة الكلاسيكية، فيه على المسرح الكبير بدار الأوبرا المصرية حفل لأوركسترا القاهرة السيمفوني، واللي هـ تحتفل بذكرى الموسيقي البلجيكي سيزر فرانك، والتذاكر متاحة بشباك الحجز. ونختم كالعادة بحفل التنورة في مركز إبداع وكالة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بـ ننشرها كل يوم على مدار الشهر تابعوا أجندتنا.

ويك إند سعيد!