The Definitive Guide to Living in the Capital , Cairo , Egypt

فعلًا مش قادرين نعرف إيه العلاقة بين الصيف والأكلات السريعة، بس واضح أن نفسنا بـ تروح على أي حاجة غلط خلال أيام الولعة الصيفية في القاهرة. موضة البرجر الجورميه محافظة على مكانتها وسط مشهد الأكل القاهري، وهنا قدر بوتشرز برجر اعتمادًا على شعبيته المتزايدة أنه يفتح فرع جديد في 6 أكتوبر وتحديدًا في ويست تاون هب.

المطعم مساحته متوسطة ومكون من قعدات مفتوحة وقعدات داخل المطعم، ولازم هـ تلاحظه في الفود كورت بشكل الميني باص الأصفر المميز خارج المكان، وسط أجوائهم المريحة والجذابة القريبة من مطاعم الستيك، الجرسون وصل ومعاه المنيوهات أول ما قعدنا.

المنيو بـ تقدم كنز من ابتكاراتهم البرجرية المميزة، من أكثر الحاجات اللي لفتت انتباهنا ميلانو برجر (54 جنيه) اللي عليه إضافات من جبن موتزاريلا وصوص بيستو، والهاوايان برجر (52 جنيه) بإضافات الأناناس والترياكي صوص.

في النهاية قررنا نطلب ساندويتشاتنا التقليدية، مايتي بوتشر (77 جنيه) وبوتشرز مشروم برجر (54 جنيه). طلبنا وصل بعد حوالي 20 دقيقة.

الساندويتشين كان معاهم كمية قليلة جدًا من البطاطس المحمرة وكمية كول سلو بسيطة. المايتي بوتشر عبارة عن 300 جرام من اللحم المشوي المستوي Medium-Well زي ما طلبنا وعليه جبن، هالوبينو، خس، بيف بيكون، جارليك-مايونيز وبصل محمر، وفعلًا كان فيه كل اللي ممكن نحلم به: بـ يشبع ولذيذ بشكل خرافي، نروح لبوتشرز مشروم برجر الأصغر من المايتي برجر، اللي برضه بـ يشبع وعليه مشروم مشوي وطلبنا قطعة اللحم مستوية Well-Done، وبـ يكون معاه حلقات بصل وإحنا طلبنا يشيلوا الجبنة السويسرية، قطعتين البرجر كانوا طازجين وتتبيلتهم ممتازة، أما الإضافات والصوصات فـ قدروا يعملوا الخلطة السحرية.

بشكل عام، فرع ويست تاون يستحق العلامة الكاملة بـ تقديمه لمكان هائل، وجرسونات ممتازين، ودقتهم العالية في تقديم برجر لذيذ، الموضوع كان يكمل لو البطاطس المقرمشة الرائعة كانت كميتها أكبر شوية.