The Definitive Guide to Living in the Capital , Cairo , Egypt

في حواري ما نعرفش عنها حاجة فيه حواري مختلفة، فيه حواري شايلة من الهموم ألف، ومن التعب ألفين، ومن الغموم ثلاثة، ومن البشر التعبانة آلاف..

دراما:

في حواري بوخاريست هـ تلاقي الدراما المعادة بشكل ممل صراحة، يعني الرجل المسجون وعياله ما يعرفوش، الست اللى بـ تحب راجل وتجوزوا في السر وما يترتب على ذلك من فضائح، المخدرات والتجارة فيها، الشباب اللى بـ يتاجر في المخدرات والعاقبة السوداء، الكآبة اللى بـ تسيطر على المنطقة علشان فيها بلطجي ومافيش حد قادر يوقفه، البطل اللى هو بطل المسلسل وبطل الحارة والراجل الجامد والخرافي اللى بـ ينقذ كل الناس وبـ ينقذ الحارة وممكن ينقذ أي حد ولازم تحبه، لكنك بـ تكتشف في النهاية أن الراضي سيد بوخاريست وبطل الجودو العالمي واللى البلد ما قدرتوش بقى تاجر مخدرات محترف، وكمان قتل بعض أفراد االعصابة الثانية.. سلم لى على الأخلاق.

تشويق:

ما ننكرش أن التشويق فن وله أساليبه وأنه من أكثر العوامل اللى بـ تشد الناس في المسلسلات خاصة في رمضان الحالي، لكن حواري بوخاريست الجزء الكئيب فيه أعلى مافيهوش تشويق، فيه كآبة بس، وده بجد، المسلسل فيه كمية كآبة تكفي السنة كاملة مش رمضان بس، يعني الأسرة المفككة واللى كل واحد فيهم عنده هم ومشكلة ما يعلم بها إلا المولى عز وجل، وكمان الأخ الفقير المضطر لشغله في المخدرات، وكأن المسلسلات مهمتها تقنعك أنك لو قفلت الدنيا في وشك ممكن تتاجر في المخدرات عادي، أو تقتل الأعداء من العصابة الثانية، وهنا المشكلة في الاجتماعي والفكرة اللى بجد.

اجتماعي:

أن حضرتك تعمل حاجة اجتماعية فأكيد ده مش معناه أنها تبقى كئيبة، ولما حضرتك تكتب عن الحواري فأكيد مش لازم كل ناسها يكونوا إما طيبين جدًا أو عندهم كبت جنسي أو تجار مخدرات أو نفسهم يوصلوا وخلاص ويشتهروا وخلاص، أن حضرتك تكتب مسلسل اجتماعي هـ تلاقى آلاف القضايا المهمة واللى محتاجين تسليط للضوء عليها، وآلاف غيرها محتاجين نعرفها للناس، غير الحاجات المُعادة والمكررة واللى بقيت صراحة مملة، أيها المؤلفون والمنتجون والمخرجون والممثلون، بجد تعبنا عاوزين جديد، وعاوزين نقول لكم أن بجد لما بـ تعملوا حاجة جديدة وفكرة تعبتوا فيها بـ نرحب بها وبـ نكتب عنها جدًا وبـ نحاول ننشرها ونعطيها حقها، المشاهد له حق عليكم أنه يستمتع وتناقشوا قضاياه، انصفوا الناس وافهموا المجتمع وذاكروه وهـ تلاقوا المردود العالي.. شكرًا حواري بوخاريست لأنها خلتنا نقول الكلام ده.