The Definitive Guide to Living in the Capital , Cairo , Egypt

وكل ليلة بـ تمر علينا من ليالي رمضان مش هـ ترجع ثاني، كل ليلة لها فرحتها الخاصة ورزقها الخاص بها، وكمحررين لكايرو 360 لازم نجرب كل أنواع الحلويات اللي نازلة رمضان، والنهارده رحنا كرامبز –Crumbs  اللي صور الـ Cups بتاعته شوقتنا جدًا أننا نروح من قبل رمضان.

كرامبز السنة دي مدلعنا آخر دلع مش بس بكب كيك البسبوسة ريد فلفيت ولا أنواع الكب كيك الثاني اللي مغرية برضه، ولا طبق الكنافة بالمانجو العملاق، والكنافة بالنوتيلا الرهيبة أو المفاجأة تورتة التشيز كيك بالبلوبيري والكنافة اللي كنا هـ نموت ونجربها من شكلها.

قبل ما نروح حجزنا بالتليفون علشان لما رحنا اليوم اللي قبله كل الـ Cups كانت خلصت، جبنا كب كنافة بالمانجو وكب كنافة بالريد فيلفت وكب كنافة بالجزر وكنافة مالتيزر، الواحدة بـ 20 جنيه. مبدأيًا يا جماعة نصيحة أخوية يا ريت تبقوا تجيبوا نوع واحد بس لو هـ تأكلوها لوحدكم، لأن حجم الكب كبير جدًا على أن فرد واحد يأكل 4 هـ يبقى انتحار، بالذات وإحنا في الشهر الكريم ده، جرب كل يوم واحدة هـ تنبسط.

نبدأ بأكثر حاجة عجبتنا وهي الكنافة بالمانجو، يا جماعة مهما السنين بـ تعدي، هـ تفضل هي في القلب جميلة، الكريمة كانت خفيفة ومنعشة مع الكنافة اللي تحت، فعلًا كانت ما تتوصفش في جمالها. أما الكنافة الريد فيلفت فمن جمالها مافيش كلام يوصفها، المشكلة بالنسبة لنا بس أن الكريمة كانت ثقيلة شوية والكنافة كانت قليلة، لكن بالنسبة لفتافيت الريد فيلفت اللي معمولة طبقات ما بين الكريم شانتيه، حاجة كده يا لالي يا لالي.

أما القنبلة الموقوتة فهي كب المالتيزر يا جماعة، تخيلوا كده من تحت طبقة كنافة فوقها طبقة مالتيزر سايحة فوقها كنافة فوقها صوص شوكولاتة بالمالتيزر، نقول إيه بعد الكلام الكبير ده كله، كنا نتمنى حبة كريم شانتيه بس تخفف عنا كورس الشوكولاتة المركز، بس لعشاق الشوكولاتة أكيد هـ تعملوا دماغ شوكولاتة فظيعة.

نيجي بقى للحاجة اللي كنا مترددين نجيبها لأننا مش بـ نحب الجزر لما بـ يتم التعامل معاه كفاكهة، لحد ما جات كب الجزر بالكنافة والكريم شانتيه علشان يخلينا نغير وجهة نظرنا تمامًا، طعمها كان حلو جدًا ومضبوط وجديد لازم تجربوه.

كرامبز السنة دي تفوق على نفسه، ومتعنا بأكثر من طعم متميز في شهر رمضان، جربوها بالراحة لو سمحتم ومع حد بـ تحبوه، لحسن تقضوا الليلة كلها مأنتخين على الكنبة أو في السرير، والليلة تروح عليكم.