The Definitive Guide to Living in the Capital , Cairo , Egypt

بقينا نشوف كثير محلات متخصصة في الأكل الحرش زي ما بـ يقولوا، اللي هو حوواشي وسجق وكبدة، الأكل اللي كان بـ يتاكل بس في عربيات الشارع بقى محلات متخصصة وبشياكة وأكل نضيف وطعم حلو وسعر مناسب.

مطعم بلدي فيه كل الحاجات دي بعد نجاح فرعه في الميرغني، فتح في شارع 9 جنب TBS في مدخل سيلانترو، المكان صغير مش كبير أمامه ترابيزتين بس، لكن الروايح الحلوة مالية المكان.

لازم نعترف أننا مش من هواة أكل الكبدة والسجق بره البيت، بس قلنا نجرب حاجة جديدة، المنيو مافيهوش غير ساندويتشات فينو للكبدة بأنواعها والسجق وطبعًا الحوواشي، والجديد كله كان في ساندويتشات البطارخ والرنجة، كمان عنده نوعين مكرونة نوع بالسجق والثاني بأي نوع كبدة تختاره، كمان ما حرمناش من السلاطات والحلو والمشاريب اللي هـ نتكلم عليها بالتفصيل.

قلنا نجرب ساندويتش الرنجة بـ 15 جنيه، وبرغم حجمه الصغير إلا أنه كان طعمه تحفة بالطحينة اللي تضبط لك مزاجك، صحيح كان فيه كام شوكة صغننين بس ما هي الرنجة مليانة شوك يا جماعة.

طلبنا كمان ساندويتش كبدة على الجريل بـ 10 جنيه، وكان سخن وحجمه كبير أكبر من الرنجة، وكان طعمه مضبوط جدًا بالخلطة.

أكثر حاجة عجبتنا هناك بساطة المكونات وتغليفها زي الحلو مثلًا، عندهم قطع قصب في علبة تقدر تمصه بنفسك وتستمتع به والعلبة بـ 7 جنيه، كمان عنده عسلية في علبة بلاستيك مليانة كور صغيرة شكلها مغري جدًا، أما الحلو المعروف بعد ساندويتشات الكبدة والسجق، هو السكلانس وهو بـ يبقى عبارة عن قشطة وحلاوة وعسل وبـ 10 جنيه.

كمان عندهم كل المشروبات من سوبيا وخروب وتمر هندي وليمون نعناع ومانجو ومياه غازية، بس أكثر حاجة شدتنا عصير اسمه ويسكي بـ 2 جنيه، الحقيقة أننا اتخضينا وافتكرناه ويسكي بجد بس السعر أوحى لنا بأن فيه حاجة غلط أكيد، ولما سألنا الجرسون قال لنا أنه مجموعة أعشاب مع صوص الطماطم.

المهم جيبنا علبة  قطع قصب وويسكي وعصير ليمون بالنعناع، الحقيقة برغم قوة مكونات الويسكي من توابل إلا أن طعم الثوم فيها فكرنا بدقة الكشري وقفلتنا تمامًا من تذوق الباقى، بس عشاق الدقة هـ تعجبهم، وللأسف لما طلبنا عصير الليمون كان جاهز وبرغم السكر إلا أن المرارة كانت غالبة عليه، يا ريتنا طلبنا سوبيا.

كانت تجربة لطيفة عامة هم محتاجين يضبطوا حاجات بسيطة بس، لكن الطعم أكيد ممتاز.