دليل كايرو 360 لعشر قاعات أفراح مميزة فى القاهرة
Cairo 360
طبعًا كل اللي في مرحلة تحضيرات الزواج هـ يفهم كل حرف هـ نقوله في السطور الجاية، واللي جرب غير اللى لسه على البر، باختصار.. متطلبات تجهيز الشقق كثيرة جدًا، ولو الواحد عامل حسابه على جنيه في لمح البصر بـ يبقوا عشرة وبدون مقدمات، التزام وراء الثاني بـ يخلص ومعاه كل الفلوس اللي الواحد كان حاططها علشان يقدر يوصل للحظة تتويج العلاقة بالفرح، ساعتها ناس كثير بـ تدخل حالة اكتئاب لأن فلوسها فعليًا بـ تكون خلصت، وبعض الجوازات بـ تتفركش –أيوه ده بـ يحصل- علشان العريس مش هـ يقدر يعمل فرح.
طبعًا كل واحد وظروفه، وكل زوجين وطموحهم في الفرح اللي كانوا بـ يتمنوه، إحنا هنا بـ نساعدكم تلاقوا قاعات أفراح مناسبة لكم، لفينا وشوفنا وجيبنا الأسعار لأكثر 10 قاعات لطيفة ومميزة مرتبة من الأقل للأعلى سعرًا، وواثقين أنه مهما كان الفلوس قليلة هـ تقدروا تفرحوا وتتبسطوا في ليلة عمركم اللي مش ممكن تفوت كده من غير طبل وزمر وضحك وتورتة والذي منه.
قاعة وباخرة علاء الدين:
نبدأ مع قاعة اقتصادية جدًا، وموقعها مميز جدًا، هي قاعة علاء الدين على النيل، مش هـ تتكسفوا وأنتم بـ تكتبوا عنوانها لأنها في الزمالك، بجوار كوبري قصر النيل، مكيفة، ولطيفة، ومجهزة لاستقبال المعازيم لحد 200 شخص، أما أسعارها فمفاجأة، بـ تبدأ من 1600 جنيه لـ 100 فرد، و2500 لـ 150 فرد، و3000 لـ 200 فردوالأسعار دي شاملة الإيجار والكوشة والدى جى والليزر والبى لايت وكفرات الكراسى الستان بالفيونكة وأطقم المفارش وتصوير الفيديو بكاميرا ديجيتال وبصورةHD وشاملة نسخةCD وشربات العروسين والمسرح المضيء وشاشة عرض LCD كبيرة والسجاد، أما الأكل فممكن العريس والعروسة يجيبوه من بره، أو القاعة تقدمه من عندها بسعر 3.5 جنيه لقطعة الجاتوه، والبيبسي بـ 3جنيه.
لو حابين تتصلوا بهم تعرفوا أكثر أرقامهم 01225461292 – 01006461930 أو زوروا صفحتهم على الفيسبوك.
يخت كيوبيد:
فيه ناس بـ تعشق المياه، وحلم حياتها تتزف في يخت محترم، مش مهم المدة قد إيه، حتى لو خمس دقائق، لكن المهم الشكل والجو يكون ممتع فعلاً، وده اللي بـ تقدمه "كيوبيد" يخت النيل اللي بـ يقدم للعرسان فرصة لطيفة لفرح يبدأ من 2750 جنيه، لمدة ساعة واحدة بس شامل الدي جي، والليزر، والأكل وإيجار اليخت طوال مدة الساعة، فيه ناس طبعًا مش هـ تحب حاجة زي دي، لكن فيه ناس ثانيةيكفيها دقائق قليلة وسط النيل الساحر علشان تعيش أجمل لحظات حياتها.
طبعًا السعر والمدة قابلين للزيادة، عدد الأفراد ثابت وهو 80 فرد فقط سعة اليخت، وسعر الساعة الواحدة 650 جنيه، أما الدي جي فثمنه 300 جنيه، وأنظمة الإضاءة والليزر بـ 200 جنيه، والبوفيه بـ يبدأ من 20 جنيه للفرد الواحد، ويوصل لـ 55 وأنتم وذوقكم، لو حابين تعرفوا أكثر ممكن تكلموهم على تليفون 01201933372 أولو عاوزين تشوفوا صور اليختزوروا صفحتهم على الفيسبوك.
قاعة الشلال:
بـ 4آلاف جنيه بس تقدروا تعملوا فرح لطيف في مكان لطيف، الكلام ده لسكان شبرا مصر، وقاعة الشلال اللي بـ تقدم للعرايس فرح شامل كوشة وأرضية مضيئة، ودي جي لطيف، وليزر وشغل إضاءة جميل، وفيديو 3 ساعات وشاشات عرض وتورتة وشو، المكان بـ يوفر إمكانيات لطيفة ثانية زي أن الكاميرات يكونوا اثنين، أو تصوير 36 صورة، أو فنون شعبية أو بالون باسم العروسين، غير رسوم إضافية زي "رسم دخول المأذون"، ممكن كمان يكون فيه إضافات زي تورتة ثلاثة أدوار بـ 250 أو خمسة أدوار بـ 350، أو سبعةأدوار بـ 450 جنيه.
القاعة في حديقة الترعة في شبرا، لو حابين تعرفوا تفاصيل أكثر اتصلوا بـ01277737177 أو شوفوا صفحة الفيسبوك.
قاعة كونكورد:
على النيل في شارع البحر الأعظمفيه قاعات أفراح كثيرة جدًا، عدينا عليهم تقريبًا واحدة واحدة، بصراحة أشيك وألطف واحدة كانت "كونكورد"،المدخل شيك جدًا، والقاعة كلها داير ما يدور زجاجية بـ تطل على النيل، واسعة وشيك، وكان لنا معاها تجربة طيبة، الالتزام من جانب المنظمين كان كبير، والاهتمام بالتفاصيل الدقيقة كان سمة أساسية عندهم.
نصيحة مننا، لو عاوزين فرح شيك، ولطيف ويساع أصحابكم وما يكلفكمش كثير وفي نفس الوقت مايكونش ردئ، ولو كنتم من هواة التفاصيل لكن مش معاكم فلوس كثير عليكم وعلى كونكورد، الـ100 فرد بـ يتكلفوا 4600 جنيه، و150 فرد بـ 5150 جنيه، والقاعة بـ تساع لحد 200 فرد.
الـ Packageالأساسي بـ يشمل القاعة والكوشة والدى جى والفيديو و2 شاشة بلازما ووحدة ليزر كاملة وزفة دمياطى وزفة مشاعل وتورتة 3 دور و200 كانز،أما بالنسبةللبوفيهات بـ تبدأسعر الفرد من 10لـ 60جنيه حسب الاختيار بالإضافةإلى 10% على البوفية، للاستفسار عن الحجز 01117798333 والمواعيد الصباحية من 3 إلى 6 مساءً والمقدم 2000 جنيه، شوفوا نماذج للأفراح االى اتعملت جواها من صفحتهم على الفيسبوك.
حديقة الأزهر:
كلنا روحنا الأزهر بارك، وشوفنا الجو عامل إزاي هناك، بصراحة حاجة فخيمة، مش ناس كثير تعرف أن فيه أفراح بـ تتعمل في حديقة الأزهر، لكن إحنا روحنا وسألنا وعرفنا المفاجأة، أنك تقدر تعمل فرحك هناك بمبالغ تبدأ من 5500 جنيه بس، وسط الخضرة وجنب الحدائق الأثرية داخل الحديقة.
البارك عامل عرض لفرح على ضفاف البحيرة، لـ 100 فرد، شامل قطعة جاتوه و3 ميني بيتزا، وبيبسي وشربات، وكوشة ودي جي، شاملة التذاكر، كل ده بـ 5500 جنيه.
طبعًا فيه اختيارات أكبر وإمكانيات أكثر ودي بـ تكون حسب اختيار العروسين، وممكن تعرفوا أكثر عنها لو كلمتوهم01022776616 أو 01221948401، وشوفوا كمانصفحة الفيسبوك.
جزيرة المعادي:
من أجمل الأماكن اللي شوفناها كأماكن لتنظيم الأفراح هي جزيرة المعادي، الاختيارات هناك كثير، والمكان هادي، والنظام شديد، وفيه إمكانية تنظيم الفرح بالنهار، وسط الخضرة والنيل، هناك فيهثلاثة عروض تقدروا تختاروا بينهم، العرض الأول هو عرض الندى، 100 فردبـ 7500 جنيه، وده شامل قاعة مكيفة بالفرش، وكوشة ودي جي وزفة دمياطي، وفيديو سي دي 3 ساعات، وشو الشربات للعروسين وشو التورتة وبي لايت، وبوفيه فيه مياه غازية في كاسات وقطعة بانية بالجبنة، وقطعة جاتوه فاخر وزجاجة مياه معدنية كبيرة، بالإضافة لتورتة 3 دور.
أما عرض البسنت فعبارة عن 100 فرد بـ 9500 جنيه، بـ يزيد على العرض الأول ليزر ودخان، وفي البوفيه ساندويتشات روزبيف، وساندويتشات فراخ، أما عرض الكاميليا فده بـ 12500 جنيه لـ 100 فرد، وبـ يزيد عليهم في البوفيه سلاطات خضراء وطحينة وبابا غنوج وزبادي وطرشي، غير أطباق رئيسية فيها ربع فرحة مشوية وقطعتين كفتة وبطاطس محمرة وأرز بالخلطة، مع الحلو، مع تورتة عروسة 3 دور، وسرفيس جاتوه وسرفيس حلو شرقي.
لو حابين تحجزوا أو تستعلموا أرقام تليفونهم (01018202003–01018202004-01018202005)، والعنوان: الجزيرة، كورنيش المعادي، أمام مستشفى المعادي.
قاعة الملكة:
في المعادي، وبـ تقدم نفسها دائمًا أنها خمس نجوم، الصور تشهد بكده، وكمان شكل الخدمة هناك، تقدروا تروحوا تتأكدوا بنفسكم، المهم بقى مانطولش عليكم، سعر القاعة دي 9900 جنيه، يعني نقول 10 آلاف، وده بـ يتضمن كوشة رقيقة جدًا، وزفة دمياطي، ودي جي، وأرضية منورة "Center piece" وتصوير فيديو وفوتوغرافيا، غير بوفيه فيه جاتوه وساليزون، وميني بيتزا وميني باتيه، وباتون ساليه غير المشروبات اللي بـ تتنوع بين مياه معدنية وبيبسي كانز وشربات كمان، وحلويات بـ تتنوع بين بيتي فور سابليه وجاتوه سواريه وفواكة طازجة، وهدية تورتة 3 أدوار، وعشاء للعروسين.
طبعًا ده عرض مغري جدًا، لكن المغري بجد بالنسبة لنا هو النظافة اللي في القاعة وطريقة الترتيب الظريفة جدًا، قاعة الملكة من ترشيحاتنا ونعتقد أنها مناسبة لسكان المعادي، وطبعًا العرض ده فيه عروض غيره أقل وأكثر، لكن ده كان أكثر عرض مناسب في رأينا، لو عاوزين تعرفوا أكثر ممكن تكلموا الأستاذ هيثم عرفان المسئول عن الحجز في القاعة على رقم 01091218534 أو تزوروا صفحتهم على الفيسبوك.
دار الأسلحة والذخيرة:
الناس بقى اللي عاوزة حاجة مختلفة تقدر تروح دار الأسلحة والذخيرة، هناك الاختيارات متنوعة جدًا، وبـ تبدأ من 14 ألف جنيه لو هـ تعملوا الفرح في قاعة "زمردة"ودي بـ تشيل من 100 لـ 150 فرد، والسعر ده لو العشاء"هاى تى" (ساندويتشات وجاتوه ومشروب بـ يُقدم على الترابيزات على طول) بـ 50 جنيه، أما لو حابين تزودوا البوفيه فالسعر هـ يزيد طبعًا، خلينا نقول لكم أن العشاء الهاى تى من 50 لـ 70 جنيه، والأوبن بوفيه من 55 لـ 95 جنيه للفرد.
العرسان اللي معازيمهم كثير لهم قاعات ثانية في الدار عدد المدعوين فيها بـ يبدأ من 200 لحد 500 فرد، والقاعات دي هي "كريستال" وسعرها 26 ألف بالعشاء، و"فرحة" 25 ألف بالعشاء، و"قصر الشوق" 26 ألف بالعشاء، وأرقامتليفونهم0223421664– 0223425649للاستفسار.
فندق بيراميزا:
لو الحالة المادية متيسرة شوية، وعاوزين حاجة فخمة جدًا، بـ نرشح لكم فندق بيراميزا في الدقي، وده فيه مجموعة من القاعات الفخمة جدًا جدًا، كأنها قصور ملكية، بـ نتكلم هنا عن قاعات زي "ليلتي"، "فرساى"، "اللوفر"، "بافبون" و"اللوتس"، طبعًا الفندق خمس نجوم، مش محتاج كلام عن جماله، أقل عدد أفراد مسموح به 80 فرد، وأقصى عدد 350 فرد.
الفندق بـ يحسب تكلفة الفرح بعدد الأفراد الحاضرين، الفرد الواحد بـ 220 جنيه، ولو بـ نتكلم في إمكانيات أكبر فالسعر بـ يطلع لـ 295 جنيه، وده بـ يشمل القاعة، والبوفيه اللي فيه عشاء فاخر، والزفة، والكوشة، وتورتة العروسين، ودي جي طوال الحفلة، وتصوير فيديو ميكسر 2 كاميرا، وتصوير فوتوغرافي، وكمان جناح للعروسين والخدمة والضريبة، يعني لو بـ نتكلم في فرح لـ 100 شخص، على أقل سعر للفرد فالفرح هـ يتكلف 22 ألف جنيه.
طبعًا مش محتاجين نتكلم عن الموقع المثالي له، وكمان الفندق عامل اليومين دول عرض خصم 35% للعروسين لقضاء شهر العسل، والعرسان يقدروا يختاروا بين مجموعة فنادق بيراميزا في الأقصروأسوان، وشرم الشيخ وسهل حشيش في الغردقة .
تقدروا تعرفوا أكثر من خلال الاتصال بالفندق بقسم الحفلات على 01027450006 – 01027450003، ولهم كمان صفحة على الفيسبوك تقدروا تعرفوا منهاأكثر عن عروضهم.
فندق تريمف:
نيجي بقى لمسك الختام، ونتكلم عن فندق تريمف، الناس اللي ساكنة في مصر الجديدة وحالتها المادية مش مزنوقة بسبب التجهيزات والذي منه، وعاوزين فرح أسطوري الناس تحكي عنه يقدروا يروحوا تريمف، في مصر الجديدة.
الاختيارات هناك بين قاعتين أساسيتين "عمرالخيام"، و"آن"، بس المشكلة أن القاعتين ما بـ يأخذوش عدد أكثر من 110 فرد، وأقل حاجة 100 فرد، إجمالى الفرح بـ يعمل 24 ألف ونصف، طبعًا ده شامل كل حاجة بما فيها الأوبن بوفيه والتصوير والتورتة وكل حاجة، بما فيه إقامة ليلتين هدية في الفندق.
لو عاوزين تفاصيل أكثر تقدروا تتصلوا بمسئول الحجز في الفندق 01005521418.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
