The Definitive Guide to Living in the Capital , Cairo , Egypt

للجميع:

أول حاجة لفتت انتباهنا أن زى ما كان فيه زمان "مهرجان القراءة للجميع" والكتب بأسعار قليلة.. كان لازم برضه يبقى فيه مهرجان الرياضة للجميع والتمرين بأسعار مخفضة.. لكن يبدو أن ده موضوع صعب جدًا.

إحنا لفينا على أماكن رياضية كثير وكتبنا كثير عن صالات رياضية.. لكن موضوعنا النهارده مختلف.

ملاحظة:

العيب مش على الصالات الغالية.. وإنما لازم يكون فيه أماكن رياضية محترمة وبأسعار تناسب كل الناس.

المختلف:

أكاديمية الديب اسم يشد فى الأول كده.. خلانا نروح وإحنا متوجسين يعنى إيه أكاديمية،إيه اللى بـ يحصل جوه.. ويا ترى الناس دى فعلًا أكاديمية ولا إيه؟ أسئلة كثير قررنا نتخطاها ونحل كلماتها المتقاطعة وإحنا جوه المكان.

لبسنا الملابس الرياضية.. واتجهنا

إحنا: مساء الخير

السكرتيرة: مساء النور يا فندم

إحنا: عاوزين نتمرن.

السكرتيرة: تتمرن إيه يا فندم

إحنا: ما هى دى المشكلة،إحنا مش عارفين نبدأ منين.

السكرتيرة: تحت أمر حضرتكم اتفضلوا معايا.

الرحلة:

من هنا بدأت الرحلة جوه المكان وإحنا بـ نستكشف وبـ نسأل عن كل تفصيلة.. كان فيه أوض كثير فى المكان وكل أوضة لها استخدام يعنى فيه مكان للأيروبكس وده له مدرب متخصص له وصالة مخصوصة كلها مرايات علشان تتفرج على نفسك وأنت بـ تتمرن والشباب كلها حيوية ونشاط.

الأوضة الثانية:

دى بقى عبارة عن صالة خاصة بالرياضات القتالية واللى عرفناه أنهم بـ يمرنوا رياضات قتالية زى الكونغ فو والكاراتيه هناك.. لكن اللى بـ نأخذه عليهم أنهم ما بـ يحترموش تقاليد شرق آسيا فى التمرين وبـ يطلعوا على بساط التمرين بالجزمة وده أمر خطير جدًا فى البلاد اللى نشأت فيها الألعاب دى.

الثالثة:

ثالث حاجة هـ تقابلك هى "الجاكوزى" وهو عبارة عن غرفتين منفصلتين كل واحدة فى طرف من أطراف الصالة واحدة للرجال والثانية للنساء.. وصراحة المكان نظيف ومرتب والجاكوزى هناك هائل.

الاستقبال:

وده عبارة عن مكان للانتظار علشان تقعد فيه وتستنى لو ميعاد التمرين الخاص بك لسه ما جاش وممكن كمان تشرب حاجة هناك.. آه لازم نقول لكم أن كل العصاير هناك طبيعية.

الصالة الرئيسية:

بصوا كل حاجة بالأجهزة وفيه كابتن، واللى عرفناه أنه دارس للموضوع وبـ يفهم صراحة.. كل عضلة لها جهاز وكل تمرينة لها جهاز غير أجهزة التخسيس والجرى.. وقررنا نجرب الأجهزة ونتمرن غلط كمان علشان نشوف رد فعل الكابتن ومع أنه عارف أننا بـ نجرب بس.. إلا أنه قعد معانا واهتم جدًا بنا وبالتمرين الصح.

النهاية:

فكرة الأكاديمية قائمة على التمرين العلمى ووجود متخصصين فى التمارين والأجهزة والتغذية والرياضات المختلفة علشان يقدموا خدمة جيدة وبأسعار معقولة وكمان بـ يعملوا خصومات للمجموعات.