The Definitive Guide to Living in the Capital , Cairo , Egypt

فيه كام مطعم فى القاهرة يتعدوا على الأصابع بـ يقدموا ساندويتشات البرجر الأصلية معمولة بحرفية عالية وكمان مقدمة بشكل جيد، منها مطعمنا المفضل “بوتشرز برجر – Butcher’s Burger” اللى فاز من 5 شهور فاتوا فى جوائز اختيارات المحررين لعام 2014 لأفضل المطاعم الأمريكية.

بوتشرز برجر فتحوا أول مطعم لهم فى المهندسين، وبعدها الزمالك، ودلوقت فى الشيخ زايد عند الكرمة مول 1، وفيه كمان فى فبراير 2015 هـ يفتحوا فرعين ثانيين، واحد فى سوديك ويست قريب من بيفرلى هيلز، والثاني فى سيتي ستارز.

افتتاح فرع جديد لازم عندنا نستغله –ونتلكك به أحيانًا- أننا نروح مكان بـ نحبه، زياراتنا لفروعه الأولى في المهندسين والزمالك أكدت لنا بما لا يدع مجال للشك أن ده مطبخ أمريكي أصيل، مطبخ تخصص في البرجر ومتفنن في صوصاته وإضافاته وأحجامه، كمان هما أضافوا المقبلات الأمريكية كمكون أساسي جنب كل ساندويتش، من كرات الجبن المقرمشة والبطاطس بالجبن الحارة، طيب إيه أخبار الفرع الجديد فى زايد؟

موجود فى الكرمة مول 1، قريب من مطعم بيانو – Piano، بـ يطل على جنينة خضراء جميلة وحجم المكان صغير، فيه ترابيزتين فى الداخل، واثنين ثانيين فى المنطقة اللى بره، ديكور المكان نفس اللى فى كل الفروع طبعًا، الحوائط طوب أحمر مكتوب عليه جمل حلوة أوى عن اللحم والبرجر الجيد، وكمان رسم لقطع اللحم وأسماؤها، فيه حمام مشترك صغير وجوده كان مهم جدًا علشان نغسل أيدينا بعد معركتنا فى افتراس برجرهم اللذيذ.

طاقم العمل لطيف جدًا، كانوا بـ يجاوبوا على أى استفسارات لنا، المنيو كبيرة وفيه أنواع كثيرة من ساندويتشات البرجر، والفراخ، والمقبلات، والسلاطات، والطلبات الجانبية، وأطباق الستيك، والسوسيس، والصوصات، ومنيو للأطفال، ومشروبات، وأخيرًا التحلية، والـ Cover اللى كان على ترابيزتنا كان حلو أوى عبارة عن شكل للوح التقطيع الخشب بتاع الجزارين، الاختلاف حلو برضه!

فيه حجمين لساندويتش البرجر: 170 جم، و300 جرام، صراحة إحنا كنا طفسين وأخذنا الـ 300 جرام لأننا كنا جعانين، بس اتضح لنا بعد ما خلصنا أكل أننا مش عارفين نأخذ نفسنا، أمال اللى هـ يأكل عندهم ساندويتش برجر اسمه The Mighty Bustard وزنه 1 كجم هـ يحصل له إيه!

لما بـ تأخذ حجم الـ 300 جرام (اسمه Go Mighty) بـ يضاف (24 جنيه) لسعر الساندويتش، طلبنا The Mighty Butcher بـ 77 جنيه، وده مكوناته خس، وجبنة وبصل مكرمل، وخيار مخلل، وهالوبينو، وبيف بيكون، وصوص الـ Garlic Mayo، وكمان اختارنا Go Mighty Southern BBQ Burger بـ 74 جنيه، وده عبارة عن صوص باربكيو مدخن، وحلقات بصل، ومزيج من الجبن، والخس والهالوبينو، الساندويتشات بـ ينزل معاها بطاطس محمرة وسلاطة كول سلو، ومن المقبلات اختارنا حلقات البصل (19 جنيه)، ومن المشروبات عصير ليمون فريش (14 جنيه)، ومشروب غازي (10 جنيه).

أول حاجة نزلت لنا كانت حلقات البصل، كان طعمها حلو ومقرمشة مع صوص الباربكيو، وبعدها جاء لنا النجم اللى قطعنا المشوار علشانه.. البرجر، طعم اللحمة مش ممكن، حلو حلاوة، إحنا اختارنا تسويته Medium-Well وده اللى رشحوه لنا علشان اللحم يكون Juicy وبجد كان اختيار فى محله، الساندويتش حجمه ضخم جدًا، ولازم تمسكه كويس لأن المكونات الكثير مع الصوصات بـ تبدأ مرحلة “الزفلطة”، المكونات فريش، الهالوبينو كان نجم الساندويتش، طعمه أضاف Twist للمكونات، البيكون كان بـ يشد شوية ناشف، البطاطس مقرمشة من بره وطرية من جوه، والكول سلو لطيفة.

بعد ما خلصنا واستريحنا شوية جاء ميعاد التحلية، شدنا من أول ما مسكنا المنيو أن عندهم Deep Fried Ice Cream بـ 34 جنيه، فرحة الأطفال كانت فى عيوننا وطلبناها على طول رغم أننا ما كناش قادرين نتنفس، دي بـ تكون عبارة عن كرة من الأيس كريم عليها عجينة مقرمشة من الخارج وبـ تتقلى فى الزيت وبـ تختار يتحط عليها صوص شوكولاتة أو كراميل، تجهيزها ما أخذش وقت كثير، العجينة كانت قرمشتها حلوة أوى من بره وسخنة وجواها آيس كريم بارد جدًا ومتماسك من جوه، عجبنا جدًا أنه متماسك وما تأثرش بحرارة القلى زي ما بـ يحصل فى بعض الأماكن وتلاقى الآيس كريم بفعل الحرارة بقى مياه، صوص الكراميل مع القرمشة مع آيس كريم الفانيليا كانوا زي الكريزة اللى بـ تزين بها آخر التورتة، ختامها مسك.

زيارتنا لبوتشرز برجر كانت مبهجة، وخاصة لبطننا، المكان قعدته لطيفة والخدمة كويسة، حتى صاحب المطعم جه يعرف رأينا شخصيًا، الأسعار غالية شوية بس أكيد ده علشان جودة اللحم اللى بـ يتعمل منه البرجر، بس مادام اتبسطنا كله يهون، الواحد لازم يدلع نفسه بين الحين والآخر.